Samir Abasov: “Futbolçular söz vermişdilər ki, bu gün qələbə qazanacaqlar”

Azərbaycan Premyer Liqasının 25-ci turunda “Sumqayıt” səfərdə “Səbail”i 1:0 hesabı ilə məğlub edib.

Futbolxeber.az saytının məlumatına görə, “Sumqayıt”ın baş məşqçisi Samir Abasov oyunsonrası mətbuat konfransında komandasının qələbəsini belə şərh edib:

“Bu oyunda 3 xal həddindən artıq önəmli idi. Uduzsaydıq, çox çətin vəziyyətə düşəcəkdik. “Kəpəz”lə oyundan sonra qırılmış vəziyyətdəydik. Futbolçular söz vermişdilər ki, bu gün qələbə qazanacaqlar. İlk dəqiqələrdən istək görünürdü”.

O, futbolçularının verdikləri sözü tutduqlarını bildirib: “Bəzən bir oyunçu ardıcıl 2-3 dəfə səhv etsə də, özünə qapanmırdı, sona qədər mübarizə aparırdı. Bu gün hər iki komanda eyni vəziyyətdə meydana çıxmışdı. Ona görə də amansız mübarizə gedirdi. Keyfiyyət olmasa da, mübarizə var idi. Bu gün lazım olan da elə uduzmamaq istəyi idi. Bu cür oyunlarda kim qol vursa, o da qalib gəlir. Düzdü, rəqib bizi əks-hücumda yaxalaya bilərdi. Xoşdur ki, sona qədər mübarizə apardıq və qələbə qazandıq. Sonda ən çox istəyən qalib gəlir. Bu gün də elə oldu. Futbolçulara təşəkür edirəm, verdikləri sözü tutdular”.

Samir Abasov qeyd edib ki, Premyer Liqadan düşsələr belə, “Sumqayıt”ı tərk etməyəcək: "Komanda Premyer Liqanı tərk etsə belə, “Sumqayıt”da olacam. Qışdan sonra 9 xal yığmışıq. Bu, heç də pis nəticə deyil. Əsas məqsdəimiz Premyer Liqada qalmaqdı. Oyun baxımından özüm də görürəm ki, mən istədiyim futbol deyil. Keçən dəfə də demişdim k, "Kəpəz”ə qarşı oynamadığımız futbolla sonuncu pilləyə layiqik. Bizim kimi komandalar istəksiz oynasa, heç nəyə ümid etməməlidi. Bu gün məgər qeyri-adi nəsə elədik? Xeyr, sadəcə komanda mübarizə apardı. Xarakter nümayiş etdirdi".

Mütəxəssis yenidən qapı xəttində Aydın Bayramova şans verməsinin səbəbini belə izah edib: "Aydını itirmək olmaz. Biz onu qazanmalıyıq. Kim təminat verə bilər ki, onu əvəzləyəcək qapıçı səhv etməyəcək? Aydınla söhbətimiz oldu. Futbolçular da ona inanırlar. Bu gün qapı xəttində elə bir problem yaşamadıq".

İbrahim CƏFƏROV