Rəşad Sadıqov: "Rəqib qapımıza zərbə endirmədən 2 qol vurdu"

"Növbəti maraqlı oyunlarımızdan biri keçdi. Düşünürəm ki, azarkeşlər üçün də maraqlı qarşılaşma alındı. Təbii ki, qələbə qazanmağa köklənmişdik".

Futbolxeber.az saytının məlumatına görə, bu sözləri "Zirə"nin baş məşqçisi Rəşad Sadıqov Azərbaycan Premyer Liqasının 25-ci turunda "Şamaxı" ilə 2:2 hesabı ilə heç-heçə etdikləri oyundan sonra keçirilən mətbuat konfransında deyib.

Təcrübəli mütəxəssis heç nədən qapılarında 2 qol gördüklərini bildirib: "Oyunun ümumi mənzərəsi qələbə qazanacağımıza yaxın kimi görünürdü. Elə oldu ki, qapımıza zərbə endirmədən rəqib iki qol vurdu. "Şamaxı"nın bir zərbəsini xatırlamıram. Futbolçular böyük sarsıntı yaşasa da, özlərində güc tapdılar, hesabı bərabərləşdirdilər. Heçnədən 2 qol buraxdıq. Sonra qol epizodlarımız, çoxsaylı hücumlarmız oldu Amma fərqlənərək hesabda irəli çıxa bilmədik. Oyunun gedişatı elə gedirdi ki...Qapına zərbə yoxdursa,i ki qol buraxırsansa, məğlub olmağa məhkumsan. Şükürlər olsun ki, belə gedişata baxmayaraq bir xal qazandıq. Futbolçularıma sona qədər apardıqları mübarizəyə görə təşəkkürümü bildirirəm"- deyə o bildirib.

Mütəxəssis çempionatın aşağı pillələrindəki rəqabətin avrokubok mübarizəsinə təsir edib-etməyəcəyi ilə bağlı söyləyib: "Çempionat elə səviyyəyə gəlib ki, həqiqətən asan oyun yoxdur. Özünüz də şahidi olursunuz. Hər bir rəqib digərindən səfərdə və ya evdə xal ala, qələbə qazana bilər. Xüsusilə də aşağı pillələrdə baş verən hadisələr oyunların gərginliyini bir az da artırır. Matçlar bir az da çətinləşir. Buna baxmayaraq, biz öz işimizi görməliyik, öz hədəflərimiz var. Bu gün futbolçularımdan narazı ola bilmərəm. 90 dəqiqə ərzində üstünlük bizdə idi, oyuna dominantlıq etdik, hücumlar qurduq, pressinq tətbiq etdik, qollar vurduq. Təəssüflər olsun ki, buraxdığımız qollar oldu. Belə buraxılan qolları anlamaqda çətinlik çəkirəm. Qapımıza penalti verildi, avtoqol oldu. Futbolçularım birinci qolun sarsıntısında idik, ikinci qolu buraxdıq. Amma həqiqətən qapımıza zərbə vurulduğunu xatırlamıram. Belə olan halda da, bir xal da qənimətdir".

R.Sadıqov mövsümün gedişində İlkin Muradov və Təmkin Xəlilzadəni əvəzedici heyətə göndərib, sonradan geri qaytarması, qışda isə Nemanya Andelkoviçi komandadan göndərib, sonra geri qaytarmasının səbəbləri ilə əlaqədar deyib: "Çempionatın ilk hissəsinin sonunda oturduq söhbətləşdik və qarşılıqlı şəkildə yollarımızı ayırmaq qərarını verdik. Elə şeylər var ki, hamısını açıq şəkildə deməyəcəm. Futbolu sevə-sevə oynamışam. Bəzən hansısa qərar qəbul edirsən, futbolçunun düşdüyü duruma, vəziyyətə baxırsan... Bəzən qərarımı dəyişirəm. Futbolçulara anlayış göstərib, həmin addımı atıram. Yoxsa, ilk dövrədən sonrakı, mövsümün əvvəlindəki qərarlarım bəlli idi. Sadəcə olaraq, futbolçular özlərinə klub tapmaqda çətinlik çəkdilər. Ondan sonra fikrimi dəyişdim. Andelkoviçlə mövsümün sonuna qədər bizimlə birlikdə olacaq və duruma görə qərar qəbul edəcəyik".