Regekampf: “Qarabağ”la oyundan sonra səviyyəmizi biləcəyik”

“Qarabağ”ın dünən qələbə qazanaraq mərhələ adlamasını istəyirdim. Bizimlə oyunöncəsi daha rahat olmaları üçün”.

Futbolxeber.az saytının məlumatına görə, bunu “Neftçi”nin baş məşqçisi Laurentsiu Regekampf jurnalistlərə açıqlamasında Azərbaycan Premyer Liqasının XXIV turunda “Qarabağ”la keçiriləcək səfər oyunu barədə danışarkən deyib.

Rumıniyalı mütəxəssisin fikrincə, Ağdam təmsilçisi UEFA Konfrans Liqasında mübarizəni dayandırdığı üçün qarşıdakı görüşə daha motivasiyalı çıxacaq: “Bizim üçün çətin oyun olacaq. “Qarabağ” Konfrans Liqası matçından sonra qayıdıb. Çox motivasiyalı olacaqlar. Üstəlik, “Gent”ə məğlub olduqlarından, oyun bizim üçün daha çətin olacaq. Hər iki komanda qələbə qazanmaq istəyəcək. Biz əlimizdən gələnin ən yaxşısını etməyə çalışacağıq. Futbolçularımız oyuna daha yaxşı köklənməlidirlər. Son ev matçındakı performansdan da artığını etməlidirlər. Bunun öhdəsindən gələ bilsələr, pozitiv nəticə olacaq”.

Baş məşqçi heyətlə bağlı ciddi problemlərinin olmadığını bildirib: “Ötən oyundan sonra bəzi problemlər var idi, onları aradan qaldıra bildik. Kilian Lebon və Höccət Haqverdi məşq etmirdilər. Eddi İsrafilov sağalsa da, hələ yüz faiz hazır deyil. Görüşə qədər hələ üç gün vaxtımız var. Ən yaxşı “11-liy”i seçməyə çalışacağıq”.

48 yaşlı mütəxəssis “Qarabağ”la qarşılaşmalardakı uğursuz seriyaya son qoymaq istədiklərini vurğulayıb: “Hər oyuna qələbə qazanmaq üçün çıxırıq. Uduzmaq istəmirik. Bu mövsüm “Qarabağ”a hər iki görüşdə məğlub olmuşuq. İndi daha yaxşı nəticəyə ümid edirik. Bu oyundan sonra səviyyəmizi biləcəyik. İnanıram ki, son 4 görüşdə olduğu kimi, “Qarabağ”la matçda da qapımızda qol görmərik” (“Report”).