“Millinin heyəti üçün seçim imkanımız geniş olmasa da...”

“İndidən millinin heyəti ilə bağlı fikir bildirmək, yeni oyunçuların komandaya cəlb olunub-olunmayacağını demək üçün hələ tezdir”.

Futbolxeber.az saytına müsahibəsində bu sözləri milli komandamızın məşqçisi Arif Əsədov deyib.

Təcrübli mütəxəssis qeyd edib ki, millinin qapısı bütün futbolçular üçün açıqdır: “Baş məşqçi heyətlə bağlı fikrini bildirəcək. Təbii ki, biz də Premyer Liqanın oyunlarını izləyirik və De Byaziyə fikirlərimizi söyləyəcəyik. Kimlərin özünü yaxşı tərəfdən göstərdiklərini daim diqqət mərkəzində saxlayırıq. Heyət üçün seçim imkanımız geniş olmasa da, millinin qapısı hamı üçün açıqdır”.

Əsədov əksər milli üzvünün hazırda ideal formadan uzaq olduğunu qeyd edib: “Çempionatın ikinci yarısı yenicə start götürüb. Cəmi 3 tur geridə qalıb. Əksər milli üzvləri hələ tam optimal formada olmasalar da, yavaş-yavaş özlərinə gəlirlər. Əsas da fiziki durumu qaldırmaq lazımdır. Çünki bizi qarşıda 2 çətin səfər oyunu gözləyir. Əsas odur ki, İsveç və Avstriya ilə oyunlara zədəsiz, yaxşı formada hazırlaşa bilək”.

İbrahim CƏFƏROV