“Turan Tovuz” “Qərb derbisi”ndən əldə olunan gəliri Türkiyəyə göndərəcək

"Turan Tovuz" Türkiyədə baş verən güclü zəlzələyə görə qardaş ölkəyə dəstək olmaq üçün təqdirəlayiq addım atıb.

Futbolxeber.az saytının klubun mətbuat xidmətinə istinadən verdiyi məlumata görə, Tovuz təmsilçisi Azərbaycan Premyer Liqasının 22-ci turunda "Kəpəz"lə matçın bilet satışından əldə olunacaq bütün gəliri yardım məqsədi ilə Türkiyəyə göndərəcək.

Qərb derbisi oyun üçün biletlər artıq satışa çıxarılıb. Biletlərin qiyməti isə 2 AZN təşkil edir. "Turan Tovuz" azarkeşləri matça bilet almaqla Türkiyəyə dəstək olmağa səsləyib.

Qeyd edək ki, fevralın 11-də keçiriləcək "Turan Tovuz" - "Kəpəz" oyunu saat 14:00-da başlayacaq.

Xatırladaq ki, fevralın 6-da səhər saatlarında Türkiyənin bir neçə bölgəsində güclü zəlzələ baş verib. Fəlakət nəticəsində 7 mindən çox insan həyatını itirib, 40 mindən çox yaralı var.