“Düşünməyin ki, arxamızda qızıl bank var”

“Neftçi”nin baş məşqçisi Laurentsiu Regekampf Azərbaycan Premyer Liqasının 20-ci turu çərçivəsində “Zirə”ni üzərində qazanılan qələbəni (1:0) şərh edib.

Futbolxeber.az saytının məlumatına görə, o, matçdan sonra keçirilən mətbuat konfransında qələbəyə görə şad olduğunu bildirib: “Həm nəticəyə, həm də kiçik zədəsi olan oyunçuların bizə qoşulmasına görə çox sevinirəm. Bu gün yeni transferlərdən razı qaldım. Oyundan-oyuna daha da yaxşı olmalıyıq. Bundan əvvəlki matçdan sonra da demişdim ki, çoxlu zədəli futbolçularımız var idi. Antalyadakı hazırlıq prosesində imkan olmadı ki, tam heyətlə yoldaşlıq oyunlarına çıxaq. Bu gün qazanılan qələbə çox vacib idi. Artıq növbəti oyunlara köklənməliyik”.

Rumın mütəxəssis azarkeşlərin kapitan Emin Mahmudovdan narazılığına, eləcə də komandanın uğursuzluğu ilə bağlı fikirlərinə belə münasibət bildirib: “Mən azarkeşlərin dediklərini şərh edə bilmərəm. Öz tərəfimdən deyə bilərəm ki, Emin Mahmudov nümunəvi oyunçudur. O, kapitanımızdır və bizim üçün çox vacib oyunçudur. Mən indi cavab olaraq ikinci yerdə qərarlaşacağımızı desəm, inanacaqsınız? Mən azarkeşlərin yazdıqlarına şərh verməyəcəm. Biz məğlub olanda onların üzülməsi normaldır. Mövsümün sonunda hər şeyi görəcəyik”.

“Neftçi”nin uğurlu çıxışı üçün nə lazımdır” sualına Regekampf belə cavab verib: “Stabilliyi qoruyub saxlamaq üçün oyunçular və davamlılıq lazımdır. Onların bir yerdə oynaması vacibdir. Ehtiyat oyunçular skamyası da yaxşı futbolçulardan təşkil edilməlidir. Hər oyunda görə bilərsiniz ki, 5-6 oyunçu ehtiyatda oturur. Onlar əzmkarlıq nümayiş etdirməlidirlər. Belə olduqda onlar da inkişaf edəcəklər və daha da yaxşı çıxış edəcəklər. Çalışırıq ki, oyundan-oyuna daha da yaxşı çıxış edək”.

O, komandasının transfer siyasəti ilə bağlı deyib: “Biz gözləmirdik ki, Laval və Donyonu itirəcəyik. Planlarımızda 3 yeni oyunçunu cəlb etmək var idi. Davamlılıq transferlərə də aiddir. Gələn oyunçular da ən azı 1 il oynamalıdır ki, öyrəşə bilsinlər. Çempionata öyrəşməlidirlər. Lakin bütün ayrılıqlar bizim tərəfimizdən olan məsələ deyildi. Donyo qalmaq istəmirdi. Laval isə yaydan müqavilə imzalamışdı. Onların qalması rəqabəti artıracaqdı. Bu durum üzərində işləyirik. Transfer pəncərəsinin sonuna qədər daha bir yeni oyunçu ilə güclənəcəyik”.

Rumın məşqçi yaxşı transferlər üçün maliyyənin də rol oynadığını qeyd edib:“Qışda komandaya neçə oyunçu transfer edə bilərik? Hücumçu, müdafiəçi, vinger cəlb etdik. Düşünməyin ki, arxamızda qızıl bank var. Bizim müəyyən büdcəmiz var. Futbol təkcə futbol komandasından getmir. İstəyirik ki, hamı xoşbəxt olsun. Ən yaxşısını etməyə çalışırıq. Futbol kənardan başqa cür görünə bilər. Heç də asan məsələlər deyil”.

Fərəc ASLANOV