Vüqar Əsgərli “Səbail” üzərində qələbəni şərh etdi

“Şamaxı”nın baş məşqçisi Vüqar Əsgərli komandasının Azərbaycan Premyer Liqasının XIX turunda “Səbail” üzərində qazandığı əzmkar qələbə (2:1) barədə danışıb. 

Futbolxeber.az saytının məlumatına görə, oyundan sonra təşkil olunan mətbuat konfransında mütəxəssis bunları deyib: “İlk növbədə azarkeşlərimizə təşəkkür edirəm. İş günü olmasına baxmayaraq, bu gün bizi dəstəksiz qoymadılar. Oyuna gəldikdə, Şahin Diniyevin fəlsəfəsinə bələdik. Antalyada “Səbail”in yoxlama oyunlarını izləmişdik. Bilirdik ki, bizi çətin oyun gözləyir. Buna baxmayaraq, komandamız bu gün əzmkarlıq göstərərək qələbə qazandı. Futbolçularımızı təbrik edirəm. Bizim üçün çox vacib qələbə idi. Artıq qarşıdakı oyunu düşünməliyik”.

Əsgərli matça zəif başlamalarının səbəbini belə izah edib: “Futbolçularda tələskənlik var idi. Müəyyən fasilədəns onra rəsmi oyuna çıxmaq, üstəlik, rəqibin heyətində sürətli futbolçuların olması və s. bütün bunlar oyunun startının uğursuz alınmasına gətirib çıxardı. Fasilədə futbolçularla söhbətimiz oldu. Oyun zamanı dronla çəkiliş gedir. Birinci hissədən sonra futbolçulara bəzi kadrları göstərdik. Alınmayan cəhətləri, özümüzdəki və rəqibdəki boşluqları izah etdik. Bu cür oyunlarda standart vəziyyətlər çox önəmlidir. Ona görə standart vəziyyətlərə ciddi hazırlaşmışdıq”.