Mübariz Orucov: “Futbolçunun pasportu önəm daşımır, əsas xarakteridir”

“Sumqayıt”ın məşqçisi Mübariz Orucov Azərbaycan Premyer Liqasının XIV turunda “Şamaxı”ya uduzduqları matç barədə danışıb.

Futbolxeber.az saytının məlumatına görə, mütəxəssis 2:4 hesablı yenilgi barədə bunları deyib:

“Danışılası çox söz yoxdu. Bu gün çox zəif təsir bağışladıq. Rəqib layiqli qələbə qazandı. Bu münasibətlə onları təbrik edirəm. Artıq növbəti oyunlar barədə düşünməliyik”.

- Azarkeşləriniz oyundan sonra məğlubiyyətə görə etirazlarını bildirirdilər. Onların bu narazılığını haqlı sayırsız?

- Azarkeşlərin narazılığını anlayıram. Biz özümüz də qələbə arzusundayıq. Şamaxıya da 3 xal üçün gəlmişdik. Lakin təəssüf ki, alınmadı. Biz də əlimizdən gələni edirik, komandanı hazırlayırıq. Çalışırıq ki, bu vəziyyətdən çıxaq.

- “Şamaxı”dan belə oyun gözləyirdiz?

- Bəli, gözləyirdik. “Şamaxıl” heç də zəif komanda deyil. Təcrübəlilərlə gənclərin vəhdətindən yaxşı komanda formalaşıb. Burada əksər kollektivlər çətinliklə üzləşirlər. Ötən tur “Şamaxı” Tovuzda da 3 xal qazanmışdı.

- Bugünkündən fərqli olaraq “Sumqayıt” ötən tur “Neftçi” ilə oyunda çox yaxşı təsir bağışlamışdı. 2 oyun arasındakı fərqin səbəbi nədədir?

- Bəli, “Neftçi” ilə oyunda daha istəkli idik. Amma bu gün rəqib bizdən daha istəkli təsir bağışladı. Bəhanə gətirmək istəməzdim. Lakin heyətdə müəyyən itkilərimiz var idi. Bu da oyunumuza təsir göstərir.

- Əvvəl “Sumqayıt” qol vura bilmirdi. Son 2 turda 4 dəfə fərqlənsəz də, indi isə müdafiədə problemlər var. Bu gün çox bəsit qollar buraxdız. Bu, nədən irəli gəlir?

- Diqqətsizlikdən. Qollarda fərdi səhvlər görünür. Bu yöndə işləyəcəyik. Çalışacağıq ki, səhvləri aradan qaldıraq. Həm müdafiədə, həm də hücumda problemlərimiz var.

- İkinci hissədə legionerlər meydana daxil olsalar da, oyunda canlanma yarada bilmədilər...

- Razıyam sizinlə. İkinci hissədə topa nəzarət bizdə olsa da, hesabı xeyrimizə dəyişə bilmədik. Çabinin müəyyən ağrıları var. Bu gün tam hazır deyildi.

- “Sumqayıt”ın heyəti heç də zəif deyil. Amma komanda 14 turdu qələbə üzünə həsrətdi. Bunun günahkarı kimdi: Aleksey Baqa, yoxsa Samir Abasov?

- Problemin məşqçilikdə olduğunu deməzdim. Pasport önəm daşımır. Əsas futbolçunun xarakteridir. Futbolçu əcnəbidisə, o demək deyil ki, “Şamaxı”nın yerli futbolçularından üstündü.