Ayxan bəy, bəlkə bir az yavaşlayaq?

Premyer Liqamızın 12-ci turunun açılış oyununda “Turan Tovuz” sona yaxın vurduğu qolla “Sumqayıt” üzərində 1:0 hesablı qələbə qazandı. 90 dəqiqə ərzində görüşə tamaşa edənlər də təsdiqləyər ki, cari mövsümün ən cansıxıcı, maraqsız qarşılaşmalarından birini izlədik. Matçdan sonra təşkil olunan mətbuat konfransında “Sumqayıt”ın baş məşqçisi Samir Abasovun da dediyi kimi, həqiqətən də I Divizion səviyyəsində bir oyun idi. Futbolçular ard-arda 3-4 dəqiqə ötürmə verməkdə belə çətinlik çəkirdilər...

Mətbuat konfransı demişkən, oyundan sonra baş məşqçilərin açıqlamaları mətbuat üçün 90 dəqiqə ilə müqayisədə daha maraqlı idi. Xüsusən də Ayxan Abbasov ehtiyat oyunçular skamyasında olduğu kimi, media önündə də xeyli fəal idi. “Turan Tovuz”un çalışdırıcısı əvvəlcə həmkarının oyunun səviyyəsinin Premyer Liqaya deyil, I Diviziona uyğun gəlməsi fikri ilə razılaşmadığını vurğuldı, bununla kifayətlənməyib Samir Abasova söz də atdı: “Yəqin Samir müəllim “Neftçi”dən sonra səviyyə baxımından aşağı komandalarda işləyəndə çətinlik çəkir”...

Amma Ayxan Abbasovun əsas “hədəf”i həmkarı yox, “Sumqayıt”ın prezidenti Riad Rəfiyev idi. Komandasının qolunu çılğınlıqla qeyd etməsi barədə sualı cavablandırarkən Ayxan Abbasovun “Bu qol bəzi adamlara ismarış idi. Öz mesajlarını aldılar” cümlələrinin məhz Rəfiyevə ünvanlaması məlum məsələdi. Təbii ki, hər kəs fikrini ifadə etməkdə azaddı. Amma Ayxan Abbasov deyəsən, bəzi şeyləri unudur.

Birincisi, “Turan Tovuz” hələ 15 xaldan başqa nəyəsə nail olmayıb. Mövsümün isə yalnız 30 faizi geridə qalıb. Çempionatın yekununda “Sumqayıt”ın, yaxud “Turan Tovuz”un turnir cədvəlində daha yüksəkdə olacağını indidən heç kim dəqiqliyi ilə deyə bilməz. III, IV dövrədə “Sumqayıt”a uduzacağı halda, yaxud mövsümün yekununda Samir Abasovun komandası turnir cədvəlində daha yüksəkdə olacağı təqdirdə Ayxan Abbasov nə deyəcək? O halda kimə mesaj göndərəcək?

İkincisi, bəli, Ayxan Abbasovun "Sumqayıt"la ardıcıl 2 dəfə avrokuboklara qatılması, ölkə kubokunda final oynaması uğurdu. Lakin belə təəssürat yaranır ki, sanki bütün bunlara Ayxan Abbasov tək nail olub. Sanki bu uğurda ondan başqa heç kimin rolu olmayıb. Axı “Sumqayıt”ın qazandığı nəticələrdə baş məşqçi kimi klub prezidentinin, futbolçuların, klub rəsmilərinin, hətta klub avtobusunun sürücüsünün də, stadionun xadiməçisinin də müəyyən rolu var. Uğur qazanmaq üçün mütləq komanda olmalıdı. Təbii ki, baş məşqçinin qazanılan uğurda böyük rolu var. Lakin hər şeyi öz adına bağlamaq heç bir məntiqə sığmır.

Şahid olduğumuz bir məqamı deyə bilərik ki, “Sumqayıt”ın ardıcıl ikinci il avrokuboklara vəsiqə qazandığı vaxt komanda ilə bağlı bir yazı hazırlayırdıq. Həmin vaxt Riad Rəfiyevlə danışmaq istəsək də, klub prezidenti “məndənsə baş məşqçi ilə danışın” demişdi. İndi Ayxan Abbasovun hər fürsətdə Rəfiyevə söz atdığını görəndə istər-istəməz bu iki hərəkət arasında müqayisə aparmalı olursan...

Ayxan Abbasov “Sumqayıt”dan inciyib. Özünə görə bunun üçün arqumentləri də var. Lakin hər fürsətdə bu incikliyi açıq-aşkar büruzə verməsi heç də xoş deyil. Ona qalsa, Samir Abasov “Neftçi”ni 9 ildən sonra çempion etdi və növbəti mövsüm komandadan göndərildi. Yaxud ortada Qurban Qurbanov nümunəsi var. “Qarabağ”la Avropada tarix yazan təcrübəli mütəxəssisin milli komanda karyerası cəmi 1 ili əhatə elədi. İndi Qurban bəy hər açıqlamasında AFFA-ya söz atmalıdı? “Qarabağ”ın çalışdırıcısının təkcə qazandığı nəticələri deyil, eləcə də təmkini, səbri, təvazökarlığı digər məşqçilərə örnək olsa, heç də pis olmaz...

İBRAHİM