“Zirə” - “Qəbələ” oyununun yeri dəyişdirildi

“Zirə” futbol klubu Peşəkar Futbol Liqasına rəsmi məktubla müraciət edib.

Futbolxeber.az-ın qurumun saytına istinadən verdiyi məlumata görə, klub ev oyunlarını keçirdiyi Zirə İdman Kompleksinin stadionunun ot örtüyünün son yoxlamalar zamanı yararsız vəziyyətdə olması ilə bağlı Azərbaycan Premyer Liqasının 5-ci  turunun “Zirə” - “Qəbələ” oyununun “Dalğa Arena”da keçirilməsini xahiş edib.

Stadionun vəziyyətini, “Zirə” klubunun rəsmi müraciətini nəzərə alan PFL 5-ci turun “Zirə” - “Qəbələ” görüşünün “Dalğa Arena”da keçirilməsinə qərar verib. Məsələ ilə bağlı “Qəbələ” İdman Klubu və görüşün keçirilməsinə cavabdeh olan digər qurumlar məlumatlandırılıb.

Xatırladaq ki, sözügedən oyun sabah saat 20:30-da başlayacaq.