Ayxan Abbasov: "9 ildən sonra Premyer Liqada qələbə qazanmaq çox böyük sevincdir"

"9 ildən sonra Premyer Liqaya qayıtmaq, səfərdə qələbə qazanmaq çox böyük sevincdir. Futbolçularımı təbrik edirəm. Həqiqətən də ilk dəqiqədən sona qədər mübarizə apardılar. Azarkeşlərə təşəkkür edirik. Tovuzda da möhtəşəm idilər, bu gün burada da. Həm Bakıda yaşayanlar, həm Tovuzdan gələnlər bizi dəstəklədilər". 

Futbolxeber.az saytının məlumatına görə, bu sözləri "Turan Tovuz"un baş məşqçisi Ayxan Abbasov Azərbaycan Premyer Liqasının 2-ci turunda "Səbail"ə səfərdə 1:0 hesabı ilə qalib gəldikləri oyundan sonra keçirilən mətbuat konfransında deyib.

"Yeni komandayıq. Bu gün hər nəticə qeydə alına bilərdi.  Hansısa nəticə bizi ruhdan salmalı deyil. "Qəbələ" ilə oyundan sonra futbolçulara bildirmişdim ki, çempionat uzun marafondur və bizi ağır yol gözləyir. Bu yolda səbrli olub, inkişaf etməliyik. Bəzi futbolçularda oyundan oyuna fərq hiss olunur. Yeni gələn oyunçuların komandaya uyğunlaşması bizi sevindirir. Qarşıdakı oyunlara hazırlaşacağıq" - deyə o bildirib. 

Mütəxəssis "Qarabağ"la 3-cü tur oyunlarının təxirə salındığını xatırladıb: "Onlara uğurlar arzulayıram. Digər oyuna hazırlaşmağa çalışacağıq".