"Ferenstvaroş"un hücumçusu: "Qarabağ" pis komanda ola bilməz"

Macarıstan "Ferenstvaroş"unun futbolçusu Frank Boli Çempionlar Liqasının 3-cü təsnifat mərhələsindəki rəqibləri "Qarabağ" haqda danışıb.

Futbolxeber.az saytının məlumatına görə, 28 yaşlı hücumçu hələlik Azərbaycan çempionu barədə geniş məlumata sahib olmadığını bildirib:

"Çempionlar Liqasında asan matçlar yoxdur, “Qarabağ” haqqında hələlik o qədər də məlumatım yoxdur. Amma bilirəm ki, onlar da bizim kimi Çempionlar Liqasının qrup mərhələsində çıxış ediblər. Ona görə də pis komanda ola bilməz.  Bu oyuna düzgün hazırlaşırıq, çərşənbə günü səfərdə oyunumuz var. O vaxta qədər peşəkar heyətdən bütün lazımi məlumatları alacağıq. Amma indi biz bazar günü ölkə çempionatının 1-ci turunun açılış oyununa diqqət yetiririk. Bu, vacib matçdır".

Qeyd edək ki, "Qarabağ"la "Ferentsvaroş" arasında  ilk görüş avqustun 3-də Bakıda, Tofiq Bəhramov adına Respublika stadionunda keçiriləcək. Oyun saat 20:00-da başlayacaq. Cavab görüşü isə avqustun 9-u Budapeştdə keçiriləcək.