Və bir daha “Neftçi” haqda...

Ötən həftənin cümə axşamısı Azərbaycan futbolu üçün uğursuz bir gün idi. Eyni gündə Konfrans Liqasındakı hər 3 təmsilçimiz - “Neftçi”, “Zirə” və “Qəbələ” meydanı məğlub tərk etdi. Həmin vaxt yazdığımız Azərbaycan futbolunun “qara cümə axşamı”sı ifadəsi bəzi azarkeşlərin xətrinə dəysə də, fakt faktlığında qalır...

Amma 2 gün əvvəl hər şey fərqli oldu. “Qəbələ” özündən güclü “Fehervar”ı doğma divarlar arasında üstələdi. 2:1 hesablı qələbə mərhələ adlamaq üçün kifayət etməsə də, buna görə kimsə Elmar Baxşıyevin komandasını qınamadı. Çünki “Qəbələ”nin məhdud büdcə ilə gördüyü işlər alqışa layiqdi. Azarkeşlərdən birinin yazdığı kimi: “Biz klubun dağılmaması üçün dua etdiyimiz halda, “Qəbələ” bura qədər gəldi”...

“Zirə” çətin Tel-Əviv səfərindən heç-heçə ilə qayıtdı. Rəşad Sadıqovun komandası əzmkarlığı ilə ilk matçda alınan məğlubiyyətin təsadüf olduğunu sübuta yetirdi. “Zirə” ilə “Makkabi”nin büdcəsi, heyəti arasındakı fərq çox böyükdü. Təmsilçimizin istər ev, istər səfər oyununda meydana ilk “11-lik”də cəmi 3 legionerlə çıxması nəzərə alınmayacaq fakt deyil...

O ki qaldı “Neftçi”yə, “ağ-qaralar” ümidləri doğrultdu. Hələ oyundan əvvəl qeyd etmişdik ki, “Neftçi” iyulun 28-də mütləq qələbə qazanmalıdı. Flaqmanın özünü, azarkeşlərini rəqibləri qarşısında əzməyə haqqı yoxdu. Komanda ya qələbə qazanıb “Aris”i mübarizədən kənarlaşdırmalı, ya da daha bir il “Qarabağ”ın böyüklüyünü qəbul etməlidi idi...

Oyunsonrası mətbuat konfransında həmkarlardan biri “Neftçi”nin baş məşqçisi Laurentsiu Regekampfa “Bir həftədə nə dəyişdi ki, bu gün qalib gəldiniz?” sualını ünvanladı. Rumın mütəxəssisin cavabı bir yana, amma reallıq budur ki, bir həftə ərzində ciddi nəsə dəyişiklik etmək mümkün deyil. 

Bəli, ilk oyun təsadüf idi. Amma “Neftçi”yə vaxt lazımdı. Yeni baş məşqçi cəmi bir aydı komandanı çalışdırır, legionerlərin hamısı da onun gəlişindən sonra heyətə cəlb olunub. “Aris”lə cavab oyununda start heyətində meydana çıxanlardan 5-i ilk dəfə idi Bakıda “Neftçi”nin formasını geyirdi. Yerdə qalan 6 futbolçudan üçü isə yanvarda “ağ-qaralar”ın heyətinə cəlb olunub. Hər nə qədər güclü məşqçi gətirsən də, səviyyəli legionerlə güclənsən də, ilk növbədə vaxta ehtiyac var. Çünki uyğunlaşma üçün mütləq və mütləq zaman tələb olunur. Məsələn, bir dostum əminliklə iddia edir ki, üçüncü qolu vuran Kenni Sayef çox güclü futbolçudu. Texnikası, sürəti və güclü zərbələri var. Əgər Sayef komandaya tam uyğunlaşsa, 1-2 aydan sonra Zubirdən daha güclü təsir bağışlayacaq. Gözləyək...   

Amma bütün bunlar da ən əsas səbəb deyil. Dünən axşam “Neftçi TV” “Aris”lə oyunla bağlı video hazırlayıb. Həmin 7 dəqiqə 10 saniyəlik video hər şeyi deyir, baxmayanlar mütləq izləsinlər. 

“Neftçi” “Aris”i bilirsiz niyə keçdi? 

Oyundan öncə futbolçuların əllərindən tutaraq meydana çıxan 44 nömrəli formalı şəhid övladlarına görə;

90 dəqiqə boyunca dayanmadan sevimli komandalarını dəstəkləyən “Forza”ya görə;

Oyuna canlı olaraq stadiondan həyat yoldaşı, balaları ilə birgə tamaşa edən xanımlara görə;

“Neftçi” sevgisini nəvələrinə ötürən babalara görə;

Yalnız qarşılaşmanın start fitindən sonra qan-tər içində tribunaya qalxa bilən Rüstəmə görə;

Görüşdən əvvəl də, oyunun gedişində də fanatları coşduran, UEFA-nın mümkün cəriməsinə məhəl qoymadan tribunada möhtəşəm ab-hava yaradan İsmayıla görə;

Qələbədən sonra sevincini dəlicəsinə qeyd edən Vüqara görə;

Rəqibin hər təhlükəli hücumundan sonra “müdafiəçilər topu çıxarsınlar, onların eşqinə bir dənə siqaret yandıracam” deyən Rövşənə görə;

Final fitindən sonra hamıdan birinci meydana qaçan Çingizə görə...

...Bir sözlə, prezidentindən sıravi işçisinə, mühafizəçisindən azarkeşinə qədər “Neftçi” bir yumruq ətrafında birləşməyi bacardığı üçün “Aris”i keçdi!

Uzun illərdən sonra ilk dəfə məhz iyulun 28-də “Neftçi”nin “Xalqın komandası” olduğuna şahidlik etdik. Tribunada hər yaşda insan var idi. Bu, əsl sevgidir. Flaqmana olan sevgi.

Amma bu, hələ yolun başlanğıcıdı “Neftçi”. Sən hələ heç nə etməmisən. Sənə könül verən, səni sevən yüz minlər, milyonlar daha artığını gözləyir. Qarşıda “Rapid”lə oyun var. Avqustun 4-də də fanatlarına eyni sevinci yaşatmalısan. Çünki bu azarkeşin səndən gözləntisi çoxdu. Bu dəstəyin, bu sevginin qarşılığını mütləq verməlisən!

İBRAHİM