Premyer Liqaya sponsorluq üçün yalnız 1 şirkət müraciət etdi

Azərbaycan Premyer Liqasının və Azərbaycan Kubokunun 2022/2023-cü illər mövsümünün titul sponsoru adına sahib olmaq istəyən şirkətlər üçün Azərbaycan Futbol Federasiyaları Assosiasiyası və Peşəkar Futbol Liqasına müraciət üçün elan olunmuş vaxt artıq başa çatıb. 

Futbolxeber.az saytının əldə etdiyi məlumata görə, bu gün 15:00-a qədər - təyin olunan vaxtın sonuna kimi yalnız 1 şirkət sponsorluq üçün müracit edib. Bu, "Azərlotereya" markası olan “Misli” mərc operatorudur. 

AFFA “Misli”nin Azərbaycan Premyer Liqasının və Azərbaycan Kubokunun 2022/2023-cü illər mövsümünün yeni titul sponsoru olacağını gələn həftənin ilk günü - avqustun 1-də rəsmən açıqlayacaq. 

Qeyd edək ki, sponsorluq müqaviləsinə əsasən “Misli” Premyer Liqanın iştirakçısı olan 10 klubun hər birinə eyni məbləğdə maddi vəsait ayıracaq. Hələlik ayrılacaq vəsaitin məbləği dəqiq olmasa da, bir müddətdir “Misli”nin hər kluba 3 milyon manat ayıracağı barədə xəbərlər yayılıb. Həmin vəsaitin 2 milyonu Premyer Liqa təmsilçilərinin əsas komandası, 1 milyon manatı isə uşaq futbolu üçün ayrılacağı deyilir.