“Neftçi” “Aris”lə oyuna hazırlaşır: azarkeşlərdən komandaya dəstək

“Neftçi” Konfrans Liqasının II təsnifat mərhələsində qarşılaşdığı “Aris” (Limassol) klubu ilə cavab oyununun hazırlığını davam etdirir. 

Futbolxeber.az saytının məlumatına görə, iyulun 21-də Kiprin Larnaka şəhərindəki “AEK Arena”da baş tutan ilk matçın ertəsi günü bərpa məşqi edən komanda birgünlük fasilədən sonra - iyulun 24-də məşqlərə başlayıb. Bu gün “Türk Hava Yolları Futbol Mərkəzi”ndə baş tutan növbəti hazırlıq prosesində əsasən toplu çalışmalar icra olunub.

Məşqi izləyənlər arasında “Neftçi”nin azarkeşləri də olublar. Fanatlar komandaya dəstəklərini nümayiş etdiriblər.

Qeyd edək ki, “Neftçi” - “Aris” matçı iyulun 28-i saat 21:00-da “Bakcell Arena”da keçiriləcək.