Kamran Quliyev: "Turu keçəcəyik, 0:2 hesabı faciə deyil"

“Bu gün baş məşqçinin təyinatından təxminən bir ay ötür. Bir həftədən çox Boluda birlikdə olduq. Baş məşqçimiz çox peşəkar və yaxşı insandır”.

Futbolxeber.az saytının məlumatına görə, bunu "Neftçi"nin prezidenti Kamran Quliyev yeni baş məşqçi Laurentisu Regekampf haqqında danışarkən deyib.

Quliyev bir oyuna görə kimisə mühakimə etməyin doğru olmadığını söyləyib: "Ona sahib çıxmamağa nə var ki. İnanıram ki, bu iş birliyi bizə kömək olacaq. Onun klubumuza verəcəyi keyfiyyəti zamanla alacağıq. Uzun yol qət edib. Məşqçilik karyerasını nəzərdə tuturam. Tənqid etmək olar. Dəstək verməmək, 2-3 oyuna görə küsmək doğru deyil".

Quliyevin sözlərinə görə, rumıniyalı mütəxəssisə öz fəlsəfəsini komandaya yeritmək qurmaq üçün vaxt lazımdır: "Gözəl futbolçuları var. Baş məşqçimizə sahib çıxmışıq, çıxacağıq da".

Kamran Quliyev Bakıda Kipr "Aris"inə qarşı keçirəcəkləri UEFA Konfrans Liqasının II təsnifat mərhələsinin cavab oyunu barədə də danışıb: "Matçın son fitindən sonra dedim ki, sonadək mübarizə aparıb turu keçəcəyik. 0:2 hesabı faciə deyil. Ola bilər, bacardığımız futbolu göstərmədik. Burada ikinci fikir ola bilməz. Bu komanda böyük potensiala malikdir. "Neftçi"də uzun müddət oynayan futbolçuların potensialını bilirsiniz. Yeni gələnlər də sifariş ərizəsinə əlavə olunub. Bu, hələ son deyil. İnanmaq istəyirik ki, nəticədə biz qalib olacağıq".

O, stadionun dolacağına və tərəfdarların oyundan ləzzət alacağına inandığını söyləyib: "Azarkeşlər klubumuza sahib çıxsınlar, gəlsinlər dəstəkləsinlər. Onların sayəsində növbəti mərhələyə vəsiqə qazanacağıq. Azarkeşsiz futbol bizə lazımd eyil. "Neftçi"ni azarkeşsiz təsəvvür etmək qeyri-mümkündür. Fanatlarımız çılğın olmalı, komandanı sonadək dəstəkləməlidir. Narazılıqları da başadüşüləndi. Onlar komandanı yüksək yerlərdə gözləyirlər. Yeni sistem tətbiq etmişik".

Kamran Quliyev transferlər barədə danışıb: "Aris"lə oyun transferlər işlərinə təsir edə bilər. Hələlik qapını bağlamamışıq. Bu günədək ən çox transfer edən klub "Neftçi"dir. Gətirdiyimiz futbolçular keyfiyyətlidir. Onların necə uyğunlaşacağını zaman göstərəcək".

Qeyd edək ki, iyulun 28-də "Bakcell Arena"da keçiriləcək "Neftçi" və "Aris" komandaları arasında keçiriləcək UEFA Konfrans Liqasının II təsnifat mərhələsinin cavab oyunu saat 21:00-da başlayacaq. İlk matçda "ağ-qaralar" 0:2 hesabı ilə uduzub.