Rəşad Sadıqov: “5 dəqiqə ərzində 2 qol buraxmağımız həlledici oldu”

Konfrans Liqasının II təsnifat mərhələsinin “Zirə” - “Makkabi” (0:3) ilk oyunundan sonra təşkil edilən mətbuat konfransında Azərbaycan təmsilçisinin baş məşqçisi Rəşad Sadıqov jurnalistlərin suallarını cavablandırdı.

Futbolxeber.az saytının məlumatına görə, o, əvvəlcə matç barədə fikirlərini bildirib: “Oyunun həlledici məqamları 5 dəqiqə ərzində buraxdığımız 2 qol oldu. Həmin dəqiqələrdə rəqibin aqressiyası aşağı düşürdü. Buraxdığımız iki ucuz qol “Makkabi”yə böyük üstünlük verdi. Komandanın həvəsdən düşməməsi bizi sevindirdi. Yeganə fərq son vuruşlarda idi. Bizim də epizodlarımız oldu. Kombinasiyalı hücumlar qurduq. Bir az dəqiq olsaydıq, oyun fərqli gedəcəkdi. İkinci yarıda da eynilə ucuz qol buraxdıq. Bunlar futbolun içində olan şeylərdir. Futbolçuların çıxışından, oyundan razıyam”.

- Təcrübə məsələsi nə qədər rol oynadı?

- Bunu bəhanə etmək istəmirəm. Təcrübə həmişə önəmlidir. Bu oyunun dərəcəsinə görə çox ucuz qollar buraxdıq. O səhvlər olmasaydı, fərqli oyun gedəcəkdi. Bu gün komandanıın yeni səviyyəyə çıxdığını gördüm. Belə rəqibdən çəkinmədik. Bəzi epizodlarda rəqibin gücü, ustalığı görünürdü. Yaxın gələcəkdə komandanın yeni səviyyəyə çıxacağına inanıram.

- Analiz etdiyiniz rəqiblə meydandakı arasında nə qədər fərq var idi?

- Nə fikirləşmişdik, o da oldu. Fərqli, daha dağıdıcı oynaya bilərdik. Topla oynayıb üstünlük yaratmaq istəyirdik. Bunu edirdik, amma səhvlər də olurdu. Belə rəqiblə səhv buraxmaq limitin yoxdur.

- Səfərə hansı ümidlə gedəcəksiz?

- Hesab böyükdür. 1 qol vurub 2 top fərqi ilə daha çox şeyə ümid etmək olardı. Hazırlaşmalı, layiqli mübarizə aparmalıyıq.

- Cəlal Hüseynov niyə oynamırdı?

- Kim güclüdür, o da oynayacaq. Bu gün bu ikili daha yaxşı idi. Başqa səbəb yoxdur.

- Mərkəz hücumçusu çatışmazlığı nə qədər hiss olundu?

- Mövsüm üçün planımız Rüstəmin mərkəzdə oynaması ilə bağlıdır. Filipe də bərpa olunur. Keytanı mövsümboyu solda planlaşdırırdıq. Bu gün Rəhimin mərkəzə daxil olub ara ötürmələri verməsini gözləyirdik. Məşqlərdə, yoldaşlıq oyunlarında bu, effekt verirdi. Keyta solda daha effektiv olduğundan belə dəyişiklik etdik.  Əsas problem bu gün hücumçu ilə bağlı deyil. Hesab həmişə ikinci dərəcəklidir, əsas oyundur. Oyunumuz yaxşı alındı.

- Ehtiyat qüvvənin azlığı çempionatda çətinlik yaratmayacaq?

- Heyəti günişləndirməyi planlaşdırırıq. Əvəzedicilərimiz əsasən gənclərdir. Zədə, cəza var. Mütləq yeni oyunçular gətirməliyik.

- Avrokuboklarda futbolçu kimi debütünüzlə baş məşqçi kimi debütünüzü necə müqayisə edə bilərsiz?

- O vaxt gənc idim, çox düşünmürdüm. Meydana çıxmaq, oynamaq istəyirdim. Böyük həvəslə də oynamışdım. Bu gün daha məsuliyyətlidir. Rəqib də fərqlidir. Meydanın kənarında oyuna çox müdaxilə edə bilmirsən. Bu da adamı gərginləşdirir. Bəlkə, meydanda bu qədər stress keçirməzdim.

- Dağıdıcılıqdan çox oyun quruculuğunu fikirləşdiyinizi dediz. Ancaq start heyətdəki hər 3 orta xətt oyunçusunun dağıdıcılıq keyfiyyətləri daha yüksəkdir. Hamdauini isə meydana sonradan buraxdız. Plan nə idi?

- Düşünmürəm ki, Coşqunun müdafiə keyfiyyətləri aşağıdır. Oyun quruculuğunu onun üzərində qurmuşduq. Yeganə dəyişiklik Hamdaui və İlkin arasında idi. Hamdaui məşq, oyun buraxmışdı. Meydanın mərkəzini rəqibə vermək istəmirdim. Oyun planı olaraq niyyət oyun dağıtmaq deyildi. Qısa paslarla daha kombinasiyalı oynamaq istəyirdik.

- Yeni legioner gələcək?

- Limit də dəyişib. Rəqiblərlə rəqabəti nəzərə almaq lazımdır. Bu gün 8 azərbaycanlı oynayırdıq. Amma heyəti genişləndirmək üçün lazımdır. İstədiyim yerliləri götürə bilmirəm. Məcburuq ki, legionerlə heyəti genişləndirək. Hələ bir legioner gətirməmişik. Planımızda var. Mütləq legioner gətirməliyik. Amma istəmirəm ki, sırf heyəti genişləndirmək üçün oyunçu gətirək.