Emin Mahmudov: "Meydana rahat çıxmaq haqqımız yoxdur"

UEFA Millətlər Liqası çərçivəsində sabah "Dalğa Arena"da keçiriləcək Azərbaycan - Slovakiya oyunu ərəfəsində təşkil olunan mətbuat konfransına millimizin baş məşqçisi Canni De Byazi ilə yanaşı,komandamızın aparıcı üzvü Emin Mahmudov da qatılıb. 

Futbolxeber.az saytının məlumatına görə, təcrübəli yarımmüdafiəçi sabahkı görüşlə bağlı bunları deyib: “Bizim meydana rahat çıxmaq haqqımız yoxdur. Tam gücümüzlə mübarizə aparmalı, əlimizdən gələni etməliyik ki, qələbə qazanaq. İlk iki oyunda qalib gələ bilməmişik. Bu dəfə uğurlu nəticə üçün çalışacağıq".

E.Mahmudov bildirib ki, rəqib sabahkı görüşdə qələbə qazanmaq üçün əlindən gələni edəcək: "Bəzən şanssızlıq olur, bəzən rəqib qapıçılar yaxşı qurtarış edir. Bəzi epizodlarda da dəqiqlik çatmır. Ya son zərbə, ya da ötürmə dəqiq olmur ki, hücumu qolla tamamlayaq. Slovakiya millisinin Bakıya qalib və ya məğlub gəlməsinin heç bir əhəmiyyəti yoxdur. Onlar qələbə qazanmaq üçün tam güclərini ortaya qoyacaqlar. Yeni baş məşqçinin rəhbərliyi altında oynayacaqlar. Ancaq biz də qələbə qazanmaq üçün əlimizdən gələni edəcəyik”.