“...Azərbaycana qarşı necə çıxış edəcəyik?”

Moldovanı penaltilər seriyasında məğlub edən Qazaxıstan millisi Millətlər Liqasında Azərbaycan yığmasının sonuncu rəqibi olub.

Futbolxeber.az saytının məlumatına görə, Moldovaya qarşı oyunlar (1:0, 0:1, penaltilər seriyasında 5:4) Qazaxıstan jurnalistlərinin narazılığına səbəb olub.

Dünənki oyundan sonra təşkil edilən mətbuat konfransında isə jurnalistlərdən biri komandanın baş məşqçisi Andrey Karpoviçə belə bir sual ünvanlayıb: “Moldova kimi zəif rəqiblərə qarşı bu cür oynayırıqsa, bəs Slovakiya, Azərbaycana qarşı necə çıxış edəcəyik?”

Karpoviç suala cavabında deyib: “Qarşıma qoyulan vəzifə Moldovanın iki oyunun nəticəsinə görə keçmək idi. Biz bunu etdik. O ki qaldı Slovakiya ilə oyuna, kim deyir ki, Moldova zəif komandadır? Bu fikri başa düşmürəm. Baxın, Moldovanın oyunçuları fərqli çempionatlarda oynayırlar. Reytinq heç də həmişə obyekt qiymət vermir. Kanada millisi dünya reytinqində neçəncidir? Çoxlu misal çəkmək olar.

Hesab edirəm ki, Belarus, Azərbaycan və Slovakiyanın yer aldığı bərabər səviyyəli komandaların qrupunda oynayacağıq. Burada təvazökar olmaq yox, qarşıya ciddi vəzifələr qoymaq lazımdır. Yoxsa, onda niyə Moldova ilə görüşdə məqsədə nail olduq. Bu, təkəbbür deyil. Qarşımıza yüksək hədəflər qoymalıyıq”.