"Qarabağ"la görüşdə iki 90 dəqiqənin gücünü sərf etdik”

"Səbail"in baş məşqçisi Aftandil Hacıyev Azərbaycan Premyer Liqansının 23-cü turunda "Qarabağ"la oyundan (1:1) sonra mətbuat konfransı keçirib.

Futbolxeber.az saytının məlumatına görə, o, bu gün qızıl xal qazandıqlarını bildirib: "Hər xal bizim üçün çox önəmlidir. "Qarabağ"la görüşdə iki 90 dəqiqənin gücünü sərf etdik. Ağır oyun oldu. Xal qazanacağımıza inanırdıq. Son matçlarda əzmkarlıqla seçilirdik. İlk hissədə hesabda önə keçdik, amma qol buraxdıq".

Baş məşqçi qapıçı Kamran Ağayevin məşqlərdə zədə aldığını və bu səbəbdən də adının iştirak ərizəsində olmadığını vurğulayıb.

O, 2 ay maaş ala bilməyən futbolçuları oyuna necə köklədiyi ilə bağlı sualı isə belə cavablandırıb: "Sevindirici haldır ki, oyunçular inamla oyuna çıxır. Onlar peşələrini çox sevir. İnanıram ki, gələcəkdə onların zəhməti yerdə qalmayacaq. Bu gün ola bilsin, nəsə itirirlər. Amma sabah qazanacaqlar. Hər oyuna çıxıb yaxşı nəticə göstərəndə onların qiyməti qalxır".