“Azərbaycan millisi ilə əvvəl qarşılaşmışıq"

"Bizim üçün yaxşı püşk oldu. Portuqaliya, Lüksemburq və İrlandiya köhnə tanışlardır. Azərbaycan millisi barədə də eyni sözləri deyə bilərəm. Əvvəlki seçmə mərhələlərdə bu yığmalarla qarşılaşmışıq".

Futbolxeber.az saytının məlumatına görə, bu sözləri Serbiya millisinin üzvü Marko Dmitroviç DÇ-2022-nin püşkünü dəyərləndirərkən deyib.

28 yaşlı qapıçı qrupdakı rəqiblərin münasib olduğunu bildirib: "Digər qruplara baxanda, bizdəki vəziyyətin pis olmadığını görmək olar. Buna görə də püşkdən razıyam. Amma qrupda istənilən komandanı məğlub etmək üçün əlimizdən gələni əsirgəməyəcəyik. Bununla belə, reallıqdan qaçmaq olmaz. Portuqaliya hörmətəlayiq komandadır".

Qeyd edək ki, seçmə mərhələnin oyunlarına 2021-ci ilin martında start veriləcək.