Kipr millisinin baş məşqçisi: “Komandama hər zamankından daha çox inanıram”

"Sabah yaxşı komandaya qarşı oyunumuz olacaq. Oyunçularıma, komandama hər zamankından daha çox inanıram. Futbolçular, assosiasiya və hamımız eyni şey uğrunda mübarizə aparmaq istəyirik. Bu, komandanı daha yaxşı duruma gətirməkdir".

Futbolxeber.az saytının məlumatına görə, bu sözləri Kipr yığmasının baş məşqçisi Yohan Valem UEFA Millətlər Liqasının 4-cü turunda millimizə qarşı oyun öncəsi keçirilən mətbuat konfransında deyib.

O bildirib ki, ən qısa müddətdə müsbət nəticə qazanmağa ehtiyacları var. "Sabah üçün hazır olduğumuzu düşünürəm. Bu, bizim missiyamızdır. Düzgün düşüncə tərzi ilə komandaya yeni nəsə gətirmək niyyətindəyik. Həmişə mübarizə aparırıq və müsbət düşünürük. Hər matçda inkişaf etməyə çalışacağıq".

Qeyd edək ki, oktyabrın 13-də Albaniyanın Elbasan şəhər stadionunda keçiriləcək Azərbaycan - Kipr görüşü Bakı vaxtı ilə saat 20:00-da başlayacaq.