Elxan Məmmədov: “Onun seçilməsi bizim üçün önəmlidir"

AFFA-nın icraçı vitse-prezidenti seçilən Elxan Məmmədovun əvvəlki postu - baş katib vəzifəsini də icra edəcək.

Futbolxeber.az saytının məlumatına görə, AFFA İcraiyyə Komitəsinin iclasından sonar brifinq keçirən E.Məmmədov deyib: “Baş katib postu yenə mənə həvalə olunub. Çünki oxşar səlahiyyətlərdir. Bu işi davam etdirməyə hazıram”.

Elxan Məmmədov AFFA-dakı islahatların nədən qaynaqlanması ilə bağlı sualı belə cavablandırıb: “Artıq iki deyil, dörd vitse-prezident var. Əvvəlki iki vitse-prezident AFFA-da oturmurdu. Lakin icraçı vitse-prezidentin də, yeni seçilən vitse-prezidentin də artıq daimi iş yeri olacaq. Bizdə əvvəldən vitse-prezident sayı çox olmalı idi. Əvvəlki illərdə olan vitse-prezidentlər bizimlə işlərimizdə əməkdaşlıq edirdi, ancaq AFFA-da olmurdular. Bir müddət əvvəl UEFA-da sədr oldum. İcraçı vitse-prezident olaraq, artıq UEFA-da da daha geniş imkanlarımız olacaq”.

Elxan Məmmədov İcraiyyə Komitəsinin yeganə qadın üzvü - Könül Mehtiyevanın seçilməsinə də münasibət bildirib: “İcraiyyə Komitəsinin üzvləri artıq öz sahələri üzrə məsuliyyət daşıyacaqlar. Könül xanımın seçilməsi də bizim üçün önəmlidir. O, bizim UEFA-dakı nümayəndəmizdir. Çox gənc yaşdan bizimlə çalışır”.