AFFA-nın dördüncü vitse-prezidenti kim olacaq: Vaqif Sadıqov, yoxsa İsgəndər Cavadov?

Yanvarın 28-də keçiriləcək növbəti Konfransında AFFA-nın qarşıdakı 4 ildəki rəhbərliyi rəsmən müəyyənləşəcək.

Futbolxeber.az saytının məlumatına görə, konfransda Rövnəq Abdullayev yenidən, dördüncü dəfə AFFA prezidenti seçiləcək. Onun seçkiyə rəqibsiz getməsi qələbəsinə heç bir şübhə yeri qoymur.  

Eləcə də İsgəndər Cavadov, Kazbek Tuayev, Elxan Məmmədov, Zaur Axundov, Rauf Əliyev, Vaqif Sadıqov, Elşad Nəsirov, Fərid Mansurov, Firudin Qurbanov, Mahir Məmmədov, Elmar Məmmədyarov və Könül Mehtiyeva İcraiyyə Komitəsinin üzvləri kimi təsdiqlənəcəklər.

AFFA-nın Konfransında assosiasiyanın vitse-prezidentlərinin də adları məlum olacaq. Əvvəlki vitse-prezidentlər - Elşad Nəsirov və Rauf Əliyev vəzifələrində qalacaqlar. Yeni təsis olunmuş AFFA-nın icraçı vitse-prezidenti vəzifəsini Elxan Məmmədov tutacaq. Əsas sual dördüncü vitse-prezidentin kimliyi ilə bağlıdır.

Əldə etdiyimiz məlumata görə, hazırda bu posta iki namizəd var - Vaqif Sadıqov və İsgəndər Cavadov. AFFA-nın dördüncü vitse-prezidenti məhz bu 2 şəxsdən biri olacaq. Yeni vitse-prezidentin futbol adamı olmasını müsbət məqam kimi qeyd etmək olar.

Əldə etdiyimiz digər məlumata görə, AFFA-nın yeni baş katibi Sərxan Hacıyev olacaq. Buna qədər o, Elxan Məmmədovun köməkçisi funksiyasını yerinə yetirirdi. S.Hacıyevin tutduğu baş katibin köməkçisi vəzifəsi isə ləğv olunacaq.