Premyer Liqanın IV turuna baxış: "Qəbələ"nin barıtı 2 atımlıq imiş...

Premyer Liqada 2013/14 mövsümünün artıq dördüncü turunun oyunları da geridə qaldı. Futbolxeber.az saytı ənənəsinə sadiq qalaraq, turun oyunlarının qısa icmalını təqdim edir. Həmçinin həftənin ən yaxşı oyunçusu və baş məşqçisini seçib, eləcə də digər maraqlı məqamları fərqləndirəcəyik.

AZAL - "SUMQAYIT" 1:0

İlk turda "Neftçi"yə böyükhesablı yenilgidən sonra çoxları AZAL-ı hesabdan silmişdi. Amma turlar keçdikcə Vaqif Sadıqovun komandası uğurlu nəticələr əldə etməkdə davam edir. Komanda artıq üçüncü pillədə qərarlaşıb. Təbii ki, bu uğurda baş məşqçi Vaqif Sadıqovun əməyi danılmazdı. "Sumqayıt"la matça gəldikdə isə komanda 3 xalı tək qolla qazandı. Ötən tur "Qəbələ"ni məğlub edən Sumqayıt təmsilçisi isə bu dəfə aldığı qırmızı vərəqələrlə diqqəti cəlb etdi. Bu isə komandada nizam-intizamın aşağı səviyyədə olduğunu göstərir. Bu gedişlə komanda yenə də Premyer Liqada qalmaq uğrunda mübarizə aparacaq.

"SİMURQ" - "BAKI" 0:3

"Bakı" ardıcıl ikinci qələbəsini qazandı. Komanda bu dəfə də böyükhesablı qələbə ilə istəyinə çatdı. Artıq Milinko Pantiçin işi göz önündədir. Bu gedişlə "Bakı" son illərdəki uğursuzluğunu unutdura biləcək. Komandada yalnız hücum xəttində axsama görünür. Marius Pena və Rauf Əliyev hələ ki etimadı doğrulda bilmirlər. "Simurq"a gəldikdə isə, ardıcıl ikinci yenilgi hazırki Zaqatala təmsilçisinin ötənilki komandadan zəif olduğunu göstərir.

"QƏBƏLƏ" - "QARABAĞ" 0:1

Bu matçda gözlənilməz nəticə qeydə alındı. Əlbəttə, cari mövsümdə "Qarabağ"ın güclü olduğu hər kəsə məlumdur. Amma məsələ ondadır ki, Ağdam klubu səfərə heç də ideal heyətlə yollanmamışdı. Baş məşqçi Qurban Qurbanov səfər 10 əsas heyət üzvünü aparmamışdı. Amma onların yoxluğunda belə, "Qarabağ" səfərdən 3 xalla dönməyi bacardı. "Qəbələ"nin oyununda isə eniş hiss olunur. Ardıcıl ikinci yenilgi komandanın iddiasını şübhə altına salır.

"XƏZƏR LƏNKƏRAN" - "NEFTÇİ" 0:0

Daha çox meydandan kənar hadisələri ilə gündəmi zəbt edən "Böyük oyun"da qol görmək azarkeşlərə nəsib olmadı. Üstünlük meydan sahiblərinin tərəfində olsa da, Stamenkoviçin uğurlu oyunu, bəxt və Nildonun qol epizodlarını sağa-sola xərcləməsi lənkəranlıların qol və qələbə arzusunu gözündə qoydu.

"RƏVAN" - "İNTER" 1:5

"Bayıl Arena"da baş tutan matç "Rəvan"ın ardıcıl ikinci darmadağını ilə yadda qaldı. Komanda artıq 5 qol buraxmağa öyrəşib. Ötən həftə də qeyd etdiyimiz kimi, "Rəvan" hazırda çempionatın aşkar autsayderidir və bu gedişlə çətin ki Premyer Liqadakı yerini qorusun. "İnter" isə nəhayət ki uğursuz gedişə "dur" deyə bildi. Komandanın qələbəsində isə baş məşqçi Kaxaber Tsxadadzenin oğlu Baçananın böyük rolu oldu. 3 dəfə rəqib qapısına yol tapan kiçik Tsxadadze bununla da mövsümün ilk het-trikini rəsmiləşdirdi.

TURUN OYUNÇUSU: Vüqar Nadirov ("Qarabağ")

TURUN MƏŞQÇİSİ: Milinko Pantiç ("Bakı")

TURUN MESAJI: "Bu hələ başlanğıcdır!" (Milinko Pantiç, "Bakı")

TURUN HAKİMİ: Fariz Yusifov