"Rəvan" "Bakı"nın farm-klubuna çevrilir

"İnter" "Simurq" "qardaşlığı"ndan sonra Premyer Liqanın daha 2 təmsilçisi eyni addımı atmaq qərarına gəliblər. İndi də "Bakı" və "Rəvan" "qardaşlaşırlar". 2 klubun sahiblərinin bir mddət əvvəl qohum olması "qardaşlıq" prosesinin təməlini qoydu. İndi də "Bakı"nın futbolçuları bir-bir üz tuturlar "Rəvan"a. "Zolaqlılar"ın baş məşqçisi Milinko Pantiçə lazım olmayan futbolçular göndərilir "Rəvan"ın düşərgəsinə. Bu "ənənə"nin təməlini Rəşad Abdullayev qoydu. Hələ Rəşad "Bakı"ya keçərkən yazmışdıq ki, bu, düzgün addım deyil. Çünki komandaya yeni baş məşqçi gəlməmiş futbolçunun transfer olunması harda görülüb? Zaman da bizim haqlı olduğumuzu göstərdi. Beləcə, əlacsız qalan rəhbərlik Abdullayevi göndərdi "qardaş"ın heyətinə. Son günlər isə "Bakı" - "Rəvan" "marşrut"unun sərnişinləri sırasına daha 2 nəfər əlavə olunub. Əvvəlcə Əziz Quliyev, indi də Aqil Nəbiyev "Rəvan"a keçdi. Hər iki oyunçu Pantiçə lazım olmadığından, çıxış yolu kimi adıçəkilən futbolçuların "Rəvan"a göndərilməsi qərara alındı. Qarşıdakı günlərdə (qışda da ola bilər) Edin Nuredinoski, Şəhriyar Əliyev, Junior Nilson, Risto Ristoviçin də "Rəvan"a üz tutduğunu görsəniz, heç təəccüblənməyin. Hələ mən "Bayıl Arena"da təmir işləri aparılan zamanı "Rəvan"ın ev oyunlarını "Bakı"nın bazasında keçirməsini, "Rəvan"ın "Bakı"nın avtobusundan istifadə etməsini demirəm...