Edu "Xəzər Lənkəran"a gəlir

Mövsümlər arası yay transfer pəncərəsinin bağlanmasına az qalmış “Xəzər Lənkəran” heyətini braziliyalı futbolçu Devid Sakkoni ilə yanaşı, həm də İspaniyanın La liqasında çıxış etmiş futbolçu ilə gücləndirmək niyyətindədir. Stadium.az xəbər verir ki, “Barselona”nın sabiq futbolçusu “Edu” ləqəbli Edu Orialı (tam adı: Eduard  Oriol Gràcia) transfer etməyə hazırlaşan “Ağ-yaşıl” klub artıq futbolçu ilə demək olar ki, bütün məsələləri həll edib. Transfermarket saytları tərəfindən transfer dəyərinin 875.000 -1.000.000-avro arası göstərildiyi futbolçunun "Xəzər Lənkəran"a keçidi yaxın günlərdə rəsmiləşəcək.

Edu Orial karyerasına “Pobla Mafumet”də başlamışdır, sonradan isə “Sant Andreu” və “Barselona B” klublarında da forma geyinib. Son iki ilini “Real Saraqosa”da keçirən Edu burada indiyə qədər ümumilikdə 39 çempionat və 6 kubok oyununda meydana çıxmışdır. Hücuma meyilli cinah yarımmüdafiəçisi “Saraqosa”nın heyətində  iki dəfə fərqlənə bilmişdir. Futbolçu avqust ayının 9-da  iki tərəfli razılaşma yolu ilə “Real Saraqosa” klubundan rəsmən yollarını ayırmış və azad agent statusuna yiyələnmişdir. Bu barədə klubun rəsmi saytı məlumat yayıb.

Qeyd edək ki, Edu Oriolun əkiz qardaşı Joan Oriol cari mövsümdən İspaniyanın  ”Osasuna” klubunun üzvüdür. Bunacan o “Villarreal”ın şərəfini qoruyurdu. Bəzən futbolsevərlər bu iki futbolçunu səhv də salırlar. Arayış üçün əlavə edək ki, “Xəzər Lənkəran”ın heyətinə qatmaq istədiyi Edu Orioldan fərqli  əkiz qardaşın transfer qiyməti 1.500.000-avro dəyərində ölçülür.