Məşqçisinin açıqlaması ilə rəzil olan “Sabah” (QEYD)

Dünən Azərbaycan Premyer Liqasında beşinci tura start verildi. Sumqayıtda keçirilən turun açılış matçında meydan sahibləri “Sabah”ı məğlub etdi. Bununla da paytaxt klubu 5-ci oyunda da qələbə üzünə həsrət qaldı. Bu məğlubiyyətlə “Sabah”ın nəinki bu, hətta növbəti turu da turnir cədvəlinin zirzəmisində başa vuracağı dəqiqləşdi. 5 oyuna cəmi 2 xal yığan “Sabah” dövrənin son 2 oyununda turnir cədvəlində ilk 2 yeri tutan “Qarabağ” və “Səbail”lə üz-üzə gələcək ki, komandanın bu görüşlərdə qələbə qazanacağı inandırıcı deyil.

Əslində, əvvəlki yazılarımızda da “Sabah”ın çıxışının çox aşağı səviyyədə olduğunu qeyd etmişdik. Amma “Sumqayıt”la oyun göstərdi ki, “Qəbələ”dən fərqli olaraq “Sabah”ın problemi tək baş məşqçi ilə bağlı deyil. Elşad Əhmədov vəzifəsindən getsə də, komanda yenə də uduzdu. Baş məşqçi əvəzi Rövşən Babayev də “Sabah”ı bu ağır durumdan çıxarda bilmədi.

“Sabah”ın zəif oyunu, uduzması artıq adi hal alıb. Əsas diqqətçəkən məqam Rövşən Babayevin oyunsonrası mətbuat konfransında səsləndirdiyi bir fikir oldu: “Sabah”dakı forvardların problemi odur ki, onların heç biri yüksək səviyyədə futbolçu deyillər”.

Bu açıqlama ilə Rövşən Babayev təkcə həmkarı Elşad Əhmədovun deyil, eləcə də klub rəhbərliyinin əməyinə qiymət verib. Belə çıxır ki, baş məşqçi yayda aşağı səviyyəli futbolçuları bəyənib, klub rəhbərliyi də onları heyətə cəlb edib. Aşağı səviyyəli futbolçunun Avroliqa uğrunda oynayanda komandada nə işi var? “Sabah”ın ilk 5 turdakı nəticələri futbolçuların Rövşən Babayevin verdiyi “aşağı səviyyəli” qiymətinə layiq olduqlarını göstərir. Maraqlıdır, görəsən, klub rəhbərliyi də uğursuz nəticələrə görə sponsorlara hesabat verərkən “forvardların problemi odur ki, onların heç biri yüksək səviyyədə futbolçu deyillər” deyəcəklər? İnandırıcı deyil. Çünki adama deyərlər ki, səviyyəsi yüksək olmayan futbolçunu komandaya niyə götürürdüz ki?

Ötən mövsüm “Sabah”ın “vuran ayağı” Marko Deviç idi. Amma o, yeni mövsümün startına bir neçə gün qalmış komandadan ayrıldı. Elə bu məqamın özü də “Sabah”ın fəaliyyətinin nə dərəcə peşəkar olmasından xəbər verir. Harda görülüb ki, iddialı klubun əsas hücumçusu mövsümün startına sayılı günlər qalmış komandadan ayrılsın? “Ailə vəziyyəti uyğun deyildi”, “Özü istədi” və s. - bütün bunlar sadəcə gülünc bəhanədi. Keçən il Deviçin ailə vəziyyəti uyğun idi, bu il uyğun olmadı?

Göründüyü kimi, “Sabah”ın təkcə oyunu, nəticəsi deyil, idarəçiliyi də istənilən səviyyədə deyil...