“Oyunu 5 dəqiqə ərzində uduzduq”

17 yaşadək futbolçulardan ibarət Azərbaycan yığma komandasının baş məşqçisi Ramin Quliyevin Avropa çempionatının seçmə qrup mərhələsi çərçivəsində bu gün Norveç yığması ilə keçirilmiş oyunla bağlı affa.az-a açıqlama verib.

Futbolxeber.az saytının məlumatına görə, gənc məşqçi qeyd edib ki, belə turnirlərdə rəqib ani səhvləri bağışlamır:

“Oyuna pis başlamadıq. Bizi nə gözlədiyini əvvəldən bilirdik. Elə ilk dəqiqələrdən hər şey gözlədiyimiz kimi oldu. Rəqib əsasən uzun ötürmələrdən istifadə edir, cinahlardan hücum təşkil edirdi. Qapımıza təyin olunan 11 metrlik cərimə zərbəsi oyunda dönüş nöqtəsi oldu. Qol buraxdıqdan sonra rəqib ard-arda 2 qol vəziyyəti yaratdı və onlardan istifadə etdi. Belə turnirlərdə rəqib ani səhvləri bağışlamır. Demək olar ki, oyunu 5 dəqiqə ərzində uduzduq. Yaratdığımız qol imkanlarından istifadə edə bilmədik. Bu məğlubiyyəti unudub qarşıdakı oyunlara daha yaxşı hazırlaşacağıq”.