Serb klubunun futbolçusu: "Azərbaycanda oynamaq məni geri salmayıb"

“Voyvodina”nın futbolçusu Milan Dyuriç Futbolxeber.az saytına açıqlama verib.

 

“Zirə”nin sabiq futbolçusu həm hazırkı komandasının, həm də sabiq komandasının çıxışından danışıb: “Voyvodina”da işlərim çox yaxşı gedir, bu komandaya keçidimə görə heç peşman deyiləm. “Voyvodina”da əsas heyətdə oynayıram. Belə deyərdim ki, "Zirə"də etdiyimi indi də “Voyvodina”da edirəm".

 

Dyuriç Azərbaycan Premyer Liqasında oynamasının onun üçün xeyirli gəldiyini söyləyib. Bundan savayı "Zirə"nin yeni baş məşqçisi Samir Abasov barədə danışıb: "Xeyr, Azərbaycanda oynamağım məni geriyə salmayıb. Çünki Azərbaycanda çox yaxşı klublar var. Avropaya hər mövsüm yollanmaq üçün yaxşı imkan var. Azərbaycanda futbol oynamaq üçün yaxşı şərait də var. “Zirə”nin çıxışı ilə hər zaman maraqlanıram. Oyundan sonra bütün görüşlərin icmalını izləyirəm. Samir Abasov çox yaxşı məşqçidi. O, bunu “Sumqayıt”dakı işləri ilə sübut edib. Onun vaxtında “Sumqayıt”ı çox bəyənirdim. Çünki onlar yaxşı futbol oynayırdılar. “Zirə” Samir Abasova vaxt verməlidi. Ümidvaram ki, hər şey yaxşı alınacaq".

 

“Zirə”ni çox bəyənirəm. Orada işləyən insanları sevirəm, yaxşı vaxt keçirirdim. “Zirə”nin əvvəki kimi yaxşı nəticələr verəcəyinə inanıram. Ola bilsin ki, nə vaxtsa Azərbaycana qayıtdım. Çünki orada insanları sevirəm, özümü Serbiyadakı kimi hiss edirdim" - deyə, Dyuriç fikirlərini yekunlaşdırıb.