Rok Kronaveter: "Bakıda sürpriz nəticəyə imza ata bilərik"

"Oyundan sonra baş məşqçimiz dedi ki, başımızı aşağı salmayaq. Bu hələ son deyil, sadəcə duelin ilk hissəsidi". 

Futbolxeber.az saytının məlumatına görə, bu sözləri "Olimpiya"nın yarımmüdafiəçisi Rok Kronaveter deyib.

Çempionlar Liqasının birinci təsnifat mərhələsinin "Qarabağ"la oyunundan sonra Sloveniyanın Siol nəşrinə danışan sloveniyalı oyunçu cavab qarşılaşmasında uğurlu nəticə qazanacaqlarına inanır. Onun sözlərinə görə, "Olimpiya" Bakıda sürpriz nəticə göstərə bilər: "Biz uğurlu nəticə qazana biləcəyimizə inanmalıyıq. Biz "Qarabağ"ın necə oynadığını gördük. Evdəki görüşdə biz "Qarabağ"a qarşı pressinqlə oynamalı idik. Bunu da etdik. Yaxşı hazırlaşmışdıq, ancaq alınmadı. Şanslarımız da az deyildi. İki-üç qol imkanlarımız oldu, sadəcə bunu reallaşdırmaq lazım idi. 

Bakıdakı görüşdə biz hücumda daha aqressiv oynayıb, qol imkanları yaratmalıyıq. Biz sürpriz nəticə göstərə bilərik. Növbəti mərhələyə adlamaq şansımız var".