"Keşlə"ni qorxudacaq komanda deyilik"

“Baltsan”ın baş məşqçisi Marko Miçoviç Avropa Liqasının birinci təsnifat mərhələsinin “Keşlə” ilə oyunundan öncə danışıb.

Futbolxeber.az saytının məlumatına görə, Malta mətbuatına açıqlama verən Miçoviç görüş barədə bunları deyib: “Hər şeyi edəcəyik ki, tarixi addım ataq. Biz “Keşlə”ni qorxudacaq komanda deyilik.

Amma gücümüz çatdığı qədər hərəkət edəcəyik. Rəqibə çətin anlar yaşatmağa çalışacağıq. Püşkatmadan sonra “Keşlə”ni analiz etməyə başladıq, onların zəif və güclü tərəflərini bilirik. Hamımız komandaya çox inanırıq. Onu söz verə bilərəm ki, biz sona qədər əlimizdən gələni edəcəyik. Malta və Azərbaycan çempionatlarının reytinq cədvəlindəki yerlərinə baxsaq, hansı komandanın favorit olduğunu deyə bilərik. Ümid edirəm ki, klub üçün tarixi uğura imza ata biləcəyik”.