Simeone: "Bizim üçün ən vacib olan 3 xaldır”

“Atletiko”nun baş məşqçisi Dieqo Simeone Çempionlar Liqasının qrup mərhələsinin üçüncü turunda "Qarabağ" ilə oyun öncəsi mətbuat konfransı keçirib. Futbolxeber.az saytının qol.az-a istinadən verdiyi məlumata görə, argentinalı mütəxəssis əvvəlcə oyun barədə fikirlərini açıqlayıb.

 - Hə, məndən əvvəl futbolçumuz Nyiqezin də dediyi kimi, ölüm-dirim oyununa çıxacağıq. Çətin olacağını bilirik. Amma uğurlu nəticə üçün əlimizdən gələni edəcəyik.

- Vacib oyuna çıxacaqsınız. İlk növbədə Antuan Qrizmandan nə gözləyirsiniz?

- Gözləntilər tək bir oyunçudan yox, bütün komandadandır. İlk 2 oyun yaxşı alınmadı. İnanıram ki, sabah istədiyimiz nəticəni əldə edəcəyik.

- “Barselona” ilə oyunda heç-heçə oynadınız. Bu nəticədən sonra narahat görünürsünüz...

- Komandamın düzgün yolda olduğunu bilirəm. Qrupdakıı ilk iki oyunda yaxşı oynasaq da, xallar itirdik. Amma mən komandama inanıram.

- “Qarabağ” o qədər də güclü deyil. Bununla belə, sabahkı oyunda hər hansı dəyişiklik etmək fikriniz var?

- Bizim üçün ən vacib olan 3 xaldır. Bunun üçün nə dəyişiklik lazımdısa, edəcəyik. Bilirik ki, elə-belə rəqiblə oynamırıq.

- “Qarabağ”da ehtiyat elədiyiniz oyunçu varmı? Varsa, kimlərdi?

- “Qarabağ”da yaxşı futbolçular var. Ortada Miçel və Enrikeni qeyd etmək olar.

- “Qarabağ” ispan futboluna yaxın oyun sərgiləyir. Bu komandaya qarşı nə cür oynamağı düşünürsünüz?

- “Qarabağ”ın ispan futboluna yaxın oynadığını bilirəm. Amma hər oyuna fərqli üslubla çıxırlar. Təhlükəli futbolçuları var. Ona görə də çox diqqətli olmalıyıq.

- “Çelsi” ilə oyuna kimi La Liqada yaxşı qələbələr qazanmışdınız.

- Hər oyuna eyni cür hazırlaşırıq. Komandama çox inanıram. Çatışmazlıqlarımız var, üzərində işləməliyik. Oyundan-oyuna daha yaxşı olacağıq.

- Azəbaycanla əməkdaşlıq etdiyiniz dövr sizin üçün çox uğurlu olmuşdu...

- Klub barədə məlumatım var. Düzdür, əməkdaşlıq bizə uğur gətirmişdi. Birinci ildə “Santyaqo Bernabeu"da “Real”ı məğlub etmişdik. Növbəti ildə La Liqa çempionu olmuşduq. 3-cü ildə isə ÇL-də finala çıxmışdıq. İnanıram ki, Azərbaycandan qayıtdıqdan sonra yenə həmin uğurları təkrarlayacağıq.