Prosineçki, nəhayət ki, qayıdır

Futbol üzrə milli komandamızın baş məşqçisi Robert Prosineçkinin Azərbaycana qayıdacağı tarix müəyyənləşib.

Futbolxeber.az saytının məlumatına görə, xorvatiyalı mütəxəssis Bakıya avqustun 20-də dönəcək.

İki aydan artıqdı ki, ölkəmizi tərk edən çəalışdırıcının belə uzun müddət kənarda qalmasının səbəbi Avropa çempionatının seçmə qrup mərhələsindən sonra postundan gedəcəyidi. Yığma komandamızın qrupdakı mövqeyinin qitə birinciliyinin pley-off mərhələsinə düşmək şanslarının da üstündən xətt çəkməsi AFFA rəhbərliyinin də mütəxəssisin şıltaqlığına göz yummasını şərtləndirib.

Qeyd edək ki, millimiz qrupda növbəti oyununu sentyabrın 4-də Bakıda San-Marino yığmasına qarşı keçirəcək. Görüş saat 21:00-da start götürəcək.