“Bu səbəbdən Hollandiya klublarının təkliflərini rədd edib, “Qəbələ”yə keçdim”

“Qəbələ”nin yeni transferi Deyv Bultuis ölkəsi Hollandiyanın mətbuatına açıqlama verib.Futbolxeber.az-ın məlumatına görə, 27 yaşlı müdafiəçi “qırmızı-qaralar”a keçidindən danışıb:

 

“Nürnberq” 4 ildi, 2-ci Bundesliqada mübarizə aparır. Gələcək karyeramla bağlı düşündüyüm üçün bu klubdan ayrıldım. Həyatımda yeni macəra istəyirəm. “Qəbələ” Avropa Liqasında çıxış edəcək. Xeyli müddətdir, bu turnirdə oynamıram. Üstəlik, “Qəbələ”nin maliyyə şərtləri çox cəlbedici idi. İndi karyeramın elə vaxtındayam ki, maliyyə haqda düşünməliyəm. Məhz bu səbəbdən Hollandiya klublarının təkliflərini rədd edib, “Qəbələ”yə keçdim”.

 

Qeyd dək ki, 1990-cı il iyunun 28-də Hollandiyada anadan olan futbolçu DCG, “Purmersteyn”, “Volendam” və “Utrext”in yeniyetmə komandalarında çıxış edib. Müdafiəçi peşəkar karyerasına da Utrextin eyniadlı təmsilçisində başlayıb. Həm sol cinahda, həm də mərkəzdə çıxış edən Bultuis 2010-2014-cü illərdə “Utrext”in şərəfini qoruyub. 2014-cü ildə Almaniyaya yollanan hollandiyalı son 3 mövsümü “Nürnberq”in heyətində keçirib.