XXII tura baxış: lider büdrədi, “Səbail” və “Zaqatala” fərqi azaltdı

Martın 26-sı və 27-də I divizionda 22-ci turun oyunları keçirildi. “Şərurspor” və “Rəvan”ın çempionatdan uzaqlaşdırılmasından sonra bu dəfə də azarkeşlər cəmi 5 qarşılaşamaya şahidlik etdilər.

5 OYUNA 1 HEÇ-HEÇƏ

Keçirilən 5 oyundan 2-də qonaqlar, 2-də meydan sahibləri qələbə qazanıblar. Yalnız 1 görüşdə qalib aşkarlanmayıb.

Meydan sahibləri 9 dəfə, qonaqlar isə 8 dəfə fərqləniblər.

Turun ən məhsuldar oyunu Zaqatalada keçirilib. Meydan sahibləri autsayder “Göyəzən”in qapısından 5 cavabsız qol keçirib.

“Zaqatala” kimi iddialı olan “Səbail” də turu böyükhesablı qələbə ilə başa vurub. Paytaxt klubu “Şahdağ” səfərindən qapısını toxunulmaz saxlamaqla 4 qollu qələbə ilə qayıdıb.

“Bakılı” - MOİK oyununda da azarkeşlər 4 qola şahidlik ediblər. Lakin Qusardakı matçdan fərqli olaraq, “Bakılı” qapısında gördüyü qollardan birinin əvəzini çıxa bilib.

Turun digər 2 matçında isə azarkeşlər 2 qol izləyiblər.

LİDER YENƏ BÜDRƏDİ

XXII tur lider “Turan-Tovuz”un xal itkisi ilə yadda qalıb. Tovuz klubu öz meydanında ikinci dövrədə kifayət qədər yaxşı təsir bağışlayan “Mil-Muğan”ı qəbul edib. İmişli klubu tovuzlulardan fərqli olaraq, çempionluq uğrunda mübarizə aparmasa da, hazırda çempionatın ən yaxşı oyun sərgiləyən komandalarından biridir. Bu səbəbdən də “Turan-Tovuz” üçün oyunun asan keçməyəcəi əvvəldən məlum idi. Belə də oldu. Əsgər Abdullayevin komandası rəqib qapısına yalnız oyunun 70-ci dəqiqəsində, penaltidən yol tapa bildi. Amma bu qol qələbə üçün kifayət etmədi. Qonaqlar son dəqiqədə yenilgidən qama bildilər. Bayram Əliyev vurduğu qolla meydan sahiblərini qələbədən məhrum etdi. Bununla da Əsgər Abdullayevin komandası ardıcıl ikinci görüşdə də xal itirdi. Amma izləyicilərinin də stabil çıxış etməməsi “Turan-Tovuz”unn işinə yarayır. Son 4 tur qalmış Tovuz klubu ən yaxın izləyicisini 3 xal qabaqlayır.

“SƏBAİL” 3 XALI 4 QOLLA QAZANDI

Liderdən fərqli olaraq, ən yaxın izləyicisi “Səbail” turu qələbə ilə başa vurdu. Çempionatın ən məhsuldar komandası səfərdə “Şahdağ”la üz-üzə gəlib. Qusar klubu yalnız 23 dəqiqə rəqibin təzyiqinə tab gətirib. 44-cü dəqiqədə daha bir qol vuran paytaxt təmsilçisi ikinci hissənin formallığa çevirdi.

İkinci yarı da oyunda diqtə edən tərəf “Səbail” idi. Elman Soltanovun komandası fasilədən sonra daha 2 dəfə fərqləndi.

“Səbail” 4 qollu qələbə qazansa da, komandanın bombardiri Bayram Budaqov meydanı qolsuz tərk edib. Düzdür, ucaboy forvard cəmi 22 dəqiqə meydan olub. Lakin o, yenə də qol şanslarını sağa-sola xərcləməklə yadda qalıb.

“ZAQATALA”DAN DARMADAĞIN

1 tur əvvəl gərgin mübarizədə “Qaradağ-Lökbatan”a uduzan “Zaqatala” bu dəfə öz meydanında “Göyəzən”i qəbul edib. Rəqibin autsayder olması, mövsümün sona yaxınlaşması meydan sahublərini mütləq 3 xal qazanmağa vadar edirdi. Bu səbəbdən də oyuna fəal başlayan Şaban Şirdanovun komandası çox keçmədən rəqib qapısına yol tapıb. Artıq 12-ci dəqiqədə Osman Qurbanov meydan sahiblərini hesabda önə keçirib. İlk yarının qalan dəqiqələrində hücumlarına ara verməyən, lakin rəqibi meydanın mərkəzinə dəvət edə bilməyən “Zaqatala” ikinci yarıda qollarını sıralayıb. Özü də maraqlıdır ki, hər iki halda Şaban Şirdanovunn komandası 2 dəqiqə ərzində 2 qol vurub. Əvvəlcə 55-ci dəqiqədə Oruc Balaşlı penaltidən fərqlənib, 56-cı dəqiqədə isə Qurbanov dublunu rəsmiləşdirib. Balaşlı 88-ci dəqiqədə dublunu rəsmiləşdirib, 1 dəqiqə sonra isə Vadim Abdullayev matçda son nöqtəni qoyub.

“ŞƏMKİR”DƏN VACİB QƏLƏBƏ

Qeyri-stabil çıxış edən “Şəmkir” öz meydanında ikinci dövrədə inamlı təsir bağışlayan “Qaradağ-Lökbatan”la üz-üzə gəlib. Görüş kifayət qədər maraqlı və gərgin alınıb. Baş hakim Rəvan Həmzəzadə 90 dəqiqə ərzində 6 sarı, 1 qırmızı vərəqədən istifadə edib.

Matça fəal başlayan meydan sahibləri artıq ilk dəqiqədə hesabı açıblar. Ruslan Voronsov komandası üçün mühüm əhəmiyyət daşıyan qola imza atıb. Qoldan daha da ruhlanan “Şəmkir” hesabda önə keçdikdən sonra da hücumlarına ara verməyib. Qonaqlar isə daha çox əks-hücumlarda rəqibi məyus etməyə çalışıblar. Meydanda maraqlı mübarizə getsə də, uzun müddət azarkeşlər qol görə bilməyiblər. Yalnız 70-ci dəqiqədə “Şəmkir” ikinci dəfə fərqlənib. Bu dəfə Vüsal Qarayev bakılıları məyus edib. İkinci qol həm də görüşün taleyini həll edib. Son 20 dəqiqədə tərəflərin səyləri nəticə vermədiyindən, matç elə “Şəmkir”in 2:0 hesablı qələbəsi ilə yekunlaşıb. Bu qələbə sayəsində Badri Kvaratsxeliyanın komandası son 4 tur öncəsi medal qazanmaq şansını saxlayıb. “Qaradağ-Lökbatan” isə çempionluq şansını demək olar ki, itirib. Çünki son 4 turda liderlə 8 xallıq fərqin aradan qalxması real deyil. Eləcə Azər Bağırovun komandasının gümüş medallar qazanmaq şansı da çətin görünür. Bu səbəbdən də “Qaradağ-Lökbatan” ən yaxşı halda bürünc medallara sahib çıxa bilər.

“BAKILI” UDUZA-UDUZA GEDİR...

Turnir cədvəli baxımından digər oyunlarla müqayisədə “Bakılı” - MOİK matçına maraq elə də böyük deyildi. MOİK hazırda 8-ci pillədə qərarlaşıb və “hərbçilər” hər hansı ciddi uğura iddia etmirlər. “Bakılı”nın isə durumu göz önündədir. Paytaxt klubunun sonuncu pillədə olması, məşqsiz oyunlara çıxması komandanın vəziyyətindən xəbər verir.

Matça gəldikdə, “İnter Arena”nın dördüncü meydançasına toplaşan azsaylı azarkeşlər 90 dəqiqə ərzində 4 qola şahidlik etdilər. Qolların 3-ü son 21 dəqiqəyə təsadüf etdi. Yekunda 3:1 hesablı qələbə qazanan MOİK xallarının sayının 33-ə çatdırdı. “Bakılı” isə əvvəlki kimi 7 xala malikdir.

Futbolxeber.az

“Layihə AFFA yanında Media Komitəsi tərəfindən maliyyələşdirilir”