Almaniya millisinin daha bir futbolçusu Bakıya gəlməyəcək

DÇ-2018-in seçmə mərhələsində Bakıda Azərbaycan millisi ilə qarşılaşacaq Almaniya yığması daha bir ulduz futbolçusunu itirib. Futbolxeber.az-ın məlumatına görə, bu itki də Dortmundun “Borussiya”  klubundadır.

 

Bel ki, Mario Götzenin ardından Marko Roys da sıradan çıxıb. 27 yaşlı hücumameyilli yarımmüdafiəçi Bundesliqasının XXIII turunda baş tutan “Borussiya” – “Bayer” matçında zədə alıb və oyunu davam etdirə bilməyib. Tibbi müayinədən keçən futbolçunun durumunun ciddi olduğu üzə çıxıb. Dortmund təmsilçisi rəsmi saytı vasitəsi ilə aparıcı futbolçusunun 1 ay yaşıl meydanlardan kənarda qalacağını açıqlayıb. Bu isə futbolçunun millidən kənarda qalması anlamına gəlir.

 

Qeyd edək ki, Azərbaycan - Almaniya oyunu martın 26-da, saat 20:00-da, Tofiq Bəhramov adına Respublika stadionunda keçiriləcək.