Daniel Subotiç: “Qəbələ” çempion olacaq” (MÜSAHİBƏ)

“Qəbələ”nin hücumçusu Daniel Subotiçin Futbolxeber.az saytına müsahibəsi

- “Neftçi” üzərində çətin qələbə qazandınız. Görüşlə bağlı nə deyə bilərsən?

- Çətin oyun alındı. “Neftçi” yaxşı komandadır, baxmayaraq ki, indi turnir cədvəlində yüksək yerlərdən birini tutmur. Yenə də “Neftçi” güclüdür, odur ki 3 xalı çox çətinliklə qazandıq. İlk hissədə hələ hesabı aça bilərdik. Amma şanslardan yararlana bilmədik. Şadam ki, yekunda qələbə qolunu vura bildik. Sonda 3 xal qazandıq və vacib olan məhz bu idi.

- Qolun ofsaytdan vurulması haqda iddia ilə bağlı fikirlərin necədir?

- Nəsə demək çətindir. Mən hesab edirəm ki, ofsayt yox idi. Dəqiq fikir yürütmək üçün təkrara baxmaq lazımdır.

- “Qəbələ”yə qayıdışını qolla qeyd etdin və komandaya vacib 3 xal qazandırdın. Təəssüratlarını bölüşərdin.

- Vurulan qol təkcə mənim yox, komandanın əziyyətinin bəhrəsidir. Qol vurmağımdan daha çox qalib gəldiyimizə sevindim.

- Hazırda hücum xəttində Baqali Dabo kimi güclü rəqibin var. Rəqabət səni qorxutmur?

- Prinsipcə, rəqabət hər komandada olmalıdır. Hər kəs oyunu ilə heyətə layiq olduğunu sübuta yetirməlidir. Rəqabət olmasa, keyfiyyət aşağı düşər.

- Azarkeşlər hesab edir ki, geri qayıdan Subotiç “Qəbələ”ni çempionluğa daşıyacaq...

- “Qəbələ” bu il çempion olacaq. Buna inanıram. Subotiçin neçə qol vurması önəmli deyil. Əsas olan hər oyunda meydana çıxıb, tam gücünlə mübarizə aparıb, qalib gəlməkdir.

- 3 ildən sonra yenidən Azərbaycan Premyer Liqasının oyununda meydana çıxdın. İlkin təəssüratların necədir, səviyyə fərqi hiss olunurdu?

- Hələ ki, yalnız 1 oyunda iştirak etmişəm. “Neftçi”yə qarşı daha əvvəl də oynamışdım. Fərq elə də çox deyil. Bilirəm ki, maddi baxımdan bir qədər dəyişiklik var. Amma yenə də hansısa oyunun zəif keçəcəyini düşünmürəm.