Millimizin Sankt-Peterburqdakı növbəti rəqibi müəyyənləşdi

Sankt-Peterburqda 19 yaşadək futbolçular arasında keçirilən Valentin Qranatkinin xatirəsinə həsr olunmuş XXIX beynəlxalq turnirdə Azərbaycan yığmasının növbəti rəqibi müəyyənləşib.

Futbolxeber.az saytının məlumatına görə, 9-16-cı yerlər uğrunda mübarizə aparacaq millimiz ilk olaraq İranla üz-üzə gələcək. Qrup mərhələsini 4 xalla başa vuran İran yığması D qrupunda III yeri tutub.

İran - Azərbaycan matçı yanvarın 15-də keçiriləcək və Bakı vaxtı ilə 15:15-də start götürəcək. Həmin görüşdə qələbə qazanacağı təqdirdə, Təbriz Həsənovun komandası 9-cu yer uğrunda mübarizəni davam etdirəcək və növbəti matçında Hindistan - Estoniya görüşünün qalibi ilə görüşəcək. Yanvarın 17-də, Bakı vaxtı ilə 20:00-da başlanacaq qarşılaşmada da qalib gələcəyi təqdirdə, yığmamız 20 yanvarda, eyni saatda 9-cu yer uğrunda həlledici görüşə çıxacaq.

Milli komandamız İranla matçda məğlub olacağı halda, 13-16-cı yerlər uğrunda mübarizə aparacaq. Bu zaman yığmamız Hindistan - Estoniya görüşündə uduzan tərəflə qarşılaşacaq.