Dino Ndlovu: “Qəbələ”nin nə etməsi üçün mənim üçün əhəmiyyətsizdir” (MÜSAHİBƏ)

“Qarabağ”ın hücumçusu Dino Ndlovu “Kəpəz”lə oyundan sonra jurnalistlərin suallarını cavablandırıb. Futbolxeber.az saytının əməkdaşının da iştirak etdiyi müsahibəni təqdim edirik:

- “Kəpəz” üzərində minimal hesablı qələbə qazandınız. Görüşün çətin alınacağını gözləyirdinmi?

- Bu, oynadığımız ən çətin ev oyunlarından biri idi. Əsas olan 3 xal idi, onu da qazandıq. Artıq “Slovan”la oyunu düşünməliyik.

- Sanki “Qarabağ”ın futbolçuları bu gün meydanda özlərini qoruyurdular...

- Zədələr futbolun bir parçasıdır. Amma qorxa-qorxa oynamaq da düzgün deyil. 2 həftə ərzində 5-6 vacib oyunumuz var. Bu səbəbdən də oyunçuların ehtiyatlı davranmalarını normal qarşılaşmaq lazımdır.

- Bugünkü matçda Avroliqa oyununun təzyiqi hiss olunurdumu?

- Xeyr, belə deməzdim. Mən hər 2 yarışa eyni gözlə baxıram. Bütün oyunlara bərabər şəkildə hazırlaşıram.

- Sanki bu gün “Qarabağ”da nəsə çatışmırdı. Həm rəqib qapısı qarşısında real qol epizodları az yaradırdınız, həm də rəqibə fərqlənmək üçün şans verirdiniz. Bu, nədən irəli gəlirdi?

- Oyunumuzda çatışmayan cəhət qol oldu. Çalışırdıq ki, mümkün qədər çox qol vəziyyətləri yaradaq və fərqlənək.

- Qol vurmağın “Slovan”la oyundan öncə motivasiyanı artıracaq?

- Məşqçimizim şans verdiyi hər futbolçu qol vurmağa çalışır. Mən də o cümlədən. Təbii ki, qol vurmaq motivasiya verir. Növbəti matçlarda da fərqlənmək üçün əlimdən gələni edəcəyəm.

- Bu günlərdə millidən imtina etməyin barədə xəbər yayıldı...

- CAR millisi ilə bağlı olan məsələdir. Bu, mövzu ölkəmlə bağlıdır və orada da qalıb. Əlavə olaraq bu barədə nəsə deməyə ehtiyac görmürəm.

- Bu gün “Qəbələ” də qələbə qazandı. 2 klub arasındakı gərgin mübarizə nə vaxta qədər davam edəcək?

- Mənim üçün bunun heç bir əhəmiyyəti yoxdur. Heç bu gün oynamalarından xəbərsiz idim. “Qəbələ”nin hə etməsi mənim üçün əhəmiyyətsizdir. Əsas olan komandamızın oyunudur.