Rüfət Quliyev: “Premyer Liqaya hazır vəziyyətdə gəlmək istəyirik”

“Oyuna yaxşı başladıq. Erkən qol vurduq. Lakin sonradan qapımızda 3 qol gördük”. Futbolxeber.az saytının Zaqatalaya ezam olunmuş əməkdaşı xəbər verir ki, bu sözləri “Ağsu”nun baş məşqçisi Rüfət Quliyev I divizionun 12-ci turunda “Zaqatala”ya 1:3 hesabı ilə uduzduqları oyundan sonra deyib.

O, məğlubiyyətə baxmayaraq, ruhdan düşmədiklərini bildirib: “İkinci hissədə rəqib azlıqda qalsa da, istəyimizə çata bilmədik. Amma bu oyunla çemponat bitmir. Mübarizəmizi davam etdirəcəyik. Çalışacağıq ki, gələcək oyunlarda daha yaxşı çıxış edək”.

Rüfət Quliyev “Ağsu”nun məqsədinin gələcəkdə Premyer Liqada çıxış etmək olduğunu bildirib: “Cavan komandayıq. 4 il ərzində 3 dəfə I divizionda medal qazanmışıq. Premyer Liqaya hazır vəziyyətdə gəlmək istəyirik. Çalışırıq ki, öz gücümüzlə yüksək liqaya vəsiqə qazanaq. Bunun üçün lisenziyalaşdırmadan keçmək lazımdır. Lisenziya tələblərindən biri də uşaq futbolu ilə bağlıdır. Hazırda 5 yaş qrupu üzrə komandamız var. Premyer Liqada oynamaq üçün bu rəqəmin 9-a çatması lazımdır. Bunun üçün isə vaxta ehtiyac var. Ağsuda bu gün 9 yaş qrupu üzrə komanda formalaşdırmaq çətindir”.