Tale Heydərov: “Meydanda əsl savaş var idi”

“Qəbələ” klubunun prezidenti Tale Heydərov “Qarabağ”la oyundan (2:0) sonra Futbolxeber.az saytına müsahibə verib. 

- Komandanız bu gün çempionluq yolunda əsas rəqibini məğlub etdi. Bu qələbəni 6 xallıq hesab etmək mümkündür?

- Bu, bizim üçün vacib oyun idi. Çempiona qarşı mübarizə aparırdıq. Komandamız butünü gücünü oryata qoydu. Meydanda əsl savaş var idi. Vacib olan 3 xal qazandıq. Əsas da bu idi.

- Əsas rəqibi üzərində qələbə qazanan “Qəbələ”nin çempionluq şansı nə dərəcədə realdır?

- Məqsədimiz çempionluqdur. Əsas rəqibimiz “Qarabağ”dır. Bu qələbə bizi məqsədimizə daha da yaxınlaşdırır. Qarşıda hələ çox oyun var. Çempionluq barədə danışmaq hələ tezdir.

- Həm “Qəbələ”, həm də “Qarabağ” cümə axşamı Avroliqada çətin oyun keçirmişdi. 3 gün əvvəlki oyunlar bugünkü matça təsir göstərdi?

- Hər iki komanda Avroliqada çox çətin oyun keçirmişdi. Çox az fasilədən sonra komandalar yenidən meydana çıxdılar. Bu da oyuna təsirsiz ötüşmədi. Lakin hər iki komanda əzmkar çıxış etdi.

- “Maynts”la görüş barədə nə deyə biərsiz?

- Həmin gün çox məyus olduq. 2:1 öndə olarkən 2:3 hesabı ilə uduzduq. Aydındır ki, “Maynts” çox güclü komandadır. Lakin qələbəni əldən verdiyimiz üçün təəssüflənirik. Çalışcağıq ki, gələcəkdə daha yaxşı mübarizə aparaq və qələbə qazanaq.