"Qarabağ"ın yeni transferi: "Özümü tərifləməyi xoşlamıram, amma..."

"Qarabağ"ın yeni transferi Nikoloz Gelaşvili "İmarət" fan-klubunun sualları cavablandırıb. Futbolxeber.az həmin müsahibəni təqdim edir:

- "Qarabağ" futbol klubu barədə ilk fikirlərin necədir?

- Komanda çox yaxşı təsir bağışlayır. Burada mehribançılıq var, çünki hamı biri birilə dostluq münasibətindədir.

- Öz fiziki durumun necədir?

- Vəziyyətim normaldır. Hal-hazırda məşqlər davam edirəm. Çalışıram ki, komandaya kömək etmək üçün daha yaxşı formada olum. Hər şey yaxşıdır.

- Transfer olmazdan əvvəl "Qarabağ" FK barədə məlumatınız var idimi?

- Bəli, bu ölkədə olan gürcü futbolçular "Qarabağ" barədə mənə müsbət məlumat vermişdilər. Demişdilər ki, "Qarabağ" ən yaxşı oynayan komandalardan biridir. Pressinq və sürəti ilə seçilir.

 - Əvvəl "Qarabağ"da oynayan gürcü futbolçu Adamiyaya qısa olaraq azarkeşlər “Bico” deyirdi. Sənə qısa olaraq nə cür müraciət olunmasını istərdin?

- (Gülür) İstəyərdim azarkeşlər mənə Niko desinlər.

- Sən komandaya transfer olmazdan əvvəl hücum xəttində boşluq var idi. Bu boşluğu dolduracağına inanırsanmı?

- Bunu zaman göstərər. Mən özümü tərifləməyi xoşlamıram. Ancaq özümə inamım var. Komanda ilə bir yerdə yaxşı nəticələr verə biləcəyimə inanıram.

- Nikonun "Qarabağ"da futbolçu kimi hədəflərdi nədir?

- Birinci olaraq Avroliqada yaxşı nəticələr vermək istəyirəm. Bir də eşitmişəm ki, "Qarabağ" 17 ildir çempion olmur. Əlimdən gələni edəcəm ki, biz bu həsrətə son verək.

- "Qarabağ"da oynayarkən yenə Gürcüstan milli komandasına dəvət alacağına inanırsan?

- "Qarabağ" güclü komandadır. Burada oynamaq mənim özüm üçün də yaxşı olacaq. Əlbəttə ki, yaxşı nəticə verə bilsəm, milli komandamıza çağrılacağam.