“Qarabağ” Olimpiya Stadionunda oynasa, ora tam dolacaq”

"Qarabağ”ın direktoru Əmrah Çəlikəlin müsahibəsi

- Bu gün UEFA nümayəndəsi Bakıda stadionlara baxış keçirdi. "Qarabağ"ın Avropa Liqasının qrup mərhələsinin ilk turunda "Slovan"la oyunu harada keçirəcəyinə qərar verildimi?

- Biz turnir müddətində ev oyunlarımızı keçirməklə bağlı UEFA-ya bir neçə variantımızı demişik. Ancaq gələn nümayəndə qərar vermək səlahiyyətində deyil. Biz "Dalğa Arena"nı, oyunların keçirilməsi mümkün olan bütün variantları göstərdik. Özümüzün görəcəyi işlərlə bağlı məlumat verdik.

- UEFA nümayəndəsi uzun müddətə icarəyə götürdüyünüz Tofiq Bəhramov adına Respublika stadionunda da olub...

- Bəli. UEFA ilə razılıq əldə olunmamış qəti bir söz demək olmaz. Gələn həftənin 1-ci və ya 2-ci günü cavab gəlməlidir ki, məsələyə aydınlıq gəlsin. Onda biləcəyik ki, nə məsləhət bilib, nə qərar veriblər. UEFA-nın qərarı ilə oyunu keçirəcəyimiz yeri biləcəyik.

- Belə çıxır ki, Bakı Olimpiya Stadionu variantı birdəfəlik gündəmdən düşüb...

- Ora bizim variantlarımıza daxil deyil.

- Bunun səbəbi nədir? Bununla bağlı birmənalı fikir söylənilmir...

- Ancaq ot örtüyünün vəziyyəti ilə bağlıdır. Başqa nə ola bilər ki?

- Belə deyilir ki, arenanın tutumu çox böyük olduğundan "Slovan"la oyunda oranı azarkeşlə doldurmaq mümkün deyil. Ona görə də "Qarabağ" həmin matçı Bakı Olimpiya Stadionunda keçirməkdə maraqlı deyil...

- Yox-yox. Bizim elə bir qorxumuz yoxdur. Biz bilirik ki, Olimpiya Stadionunda oynasaq, ora tam dolacaq. Ancaq indi bizim üçün əsas amil ot örtüyüdür.

- Bəs hazırda Respublika stadionunun qazonu necədir? UEFA nümayəndəsində hansı təəssürat oyatdı?

- Bununla bağlı UEFA-ya bir təklifimiz oldu. İnşallah, həftənin 1-ci günü bu haqda ətraflı məlumat verə biləcəyəm.

- Ot örtüyünün vəziyyəti düzəlirmi?

- Düzəlir. Qazonda bərpa işləri gedir.

- Belə demək olar ki, indiki vəziyyətdə "Slovan"la matçı "Dalğa Arena"da keçirməyi daha optimal sayırsınız?

- Yox. Əgər UEFA icazə versə, "Tofiq Bəhramov"da da oyun keçirilə bilər. Bunu o zaman biləcəyik ki, UEFA-nın mərkəzi ofisindən məlumat gəlsin (sportnet.az).