UEFA “Qarabağ”ın qələbəsinə şahidlik edən hakimi Bakıya göndərir

Avroliqanın pley-off mərhələsinin cavab oyunu çərçivəsində keçiriləcək “Qarabağ” - “Göteborq” matçını rusiyalı Vladislav Bezborodov idarə edəcək. Futbolxeber.az saytının məlumatına görə, 43 yaşlı hakim artıq 7 ildir ki, FİFA referisi statusunu daşıyır. Bezborodov 3 dəfə Azərbaycan klubunun oyununu idarə edib. İlk belə hal 2009-cu ildə keçirilən “Birlik Kuboku”na təsadüf edib. Həmin vaxt rusiyalı referinin idarə etdiyi oyunda “İnter” əvvəlcə qrup mərhələsində “Ventspils”i 2:0 hesabı ilə məğlub edib. Daha sonra isə finalda Soliqorsk “Şaxtyor”u ilə matçda təmsilçimiz penaltilərlə sevinib.

Ötən mövsüm isə Avroliqanın pley-off mərhələsinin ilk matçında Bezborodovun idarə etdiyi görüşdə “Qarabağ” səfərdə “Yanq Boyz”u 1:0 hesabı ilə məğlub edib. 2015-ci il, avqustun 20-də keçirilən oyunda rusiyalı hakim “Qarabağ”ın 2 futbolçusunu sarı vərəqə ilə cəzalandırıb.