Rahid Əmirquliyev: “Bu, bizim üçün ən vacib oyun olacaq”

“Havaya görə qaçmaq, oynamaq çətin idi. 3:0 hesablı qələbə baxmayaraq,hər hansı rahatlıqdan söhbət getmir”. Futbolxeber.az saytına müsahibəsində bu sözləri “Qarabağ”ın üzvü Rahid Əmirquliyev Topaz Premyer Liqasının III turunda “Neftçi”ni 3:0 hesabı ilə darmadağın etdikləri oyundan sonra deyib.

Təcrübəli yarımmüdafiəçi Avroliqanın pley-off mərhələsinin ilk oyununda səfərdə “Göteborq”a 0:1 hesabı ilə uduzduqları görüşdən də danışıb: “Səfərdə üstün oynadıq. Yaxaladığımız qol şanslarından yararlana bilmədik. Rəqib isə qapımıza 2 zərbə vurdu ki, onun da biri qol oldu. Ev oyununda şansımızı boşa verə bilmərik. Bu, bizim üçün ən vacib oyundu. Sabahdan həmin görüşə hazırlaşacağıq”.

Əmirquliyev artıq formasını bərpa etdiyini bildirib: “Uzun müddət oynamadım. İndi bir qədər oyun praktikasının yoxluğundan əziyyət çəkirəm. Formamı təzədən yığıram. Düşünürəm ki, meydana çıxmağa tam hazıram”.

“Qarabağ”ın üzvü millimizin baş məşqçisi Robert Prosineçkidən dəvət gözlədiyini gizlətməyib: “Millinin heyəti ilə bağlı yekun qərarı baş məşqçi qəbul edir. Mən özümü millidə oynamağa hazır sayıram”.

Rahid Əmirquliyev cari mövsümdə Topaz Premyer Liqasında komandaların sayının 8-ə enməsinə də toxunub: “Komanda sayı nə qədər çox olsaydı, çempionat da bir o qədər maraqlı olardı. Hazırda bəzi komandalar yaxşı təsir bağışlamırlar. Düşünürəm ki, zamanla onlar da yaxşı oyun göstərəcəklər”.