“Şkendiya”nın baş məşqçisi: “Neftçi” çox ağıllı oynadı”

“Oyunu planlaşdırdığımız kimi keçirdik. “Neftçi”ni analiz etmişdik. Rəqibin heyətində bəzi mövqelərdə dəyişikliklər var idi. Amma bu, bizim üçün vacib deyildi”. Futbolxeber.az saytının məlumatına görə, bu sözləri Makedoniyanın "Şkendiya" klubunun baş məşqçisi Bruno Akrapoviç deyib.

Avroliqanın II təsnifat mərhələsinin ilk oyunu çərçivəsində baş tutan “Neftçi” - “Şkendiya” görüşü qolsuz bərabərliklə tamamlanıb.

“Şkendiya”nın çalışdırıcısı matç ərzində topa daha çox sahib olduqlarını vurğulayıb: “Matçın gedişində topa daha çox sahib olduq. İkinci hissədə rəqib bir qədər təzyiqi artırdı. “Neftçi” çox ağıllı oynadı. Meydandan daha yaxşı nəticə ilə ayrıla bilərdik. Lakin 0:0 da pis deyil”,

Xorvat mütəxəssis “Neftçi”nin heyətlə bağlı çatışmazlığından xəbərdar olduğunu qeyd edib: “Neftçi”nin heyətlə bağlı problemləri var idi. Bu da oyunda hiss olunur. Bilirdim ki, rəqib baş məşqçinin matçın gedişində heyətdə ciddi dəyişikliklər etməyə imkanı yox idi”.

Akrapoviç komandasının fiziki cəhətdən yorğun olduğunu söyləyib: “Bu gün komandam daha yaxşı oynadı. Bundan da yaxşı çıxış edə bilərdik. Sadəcə, komandada bir qədər yorğunluq var”.