Serjinyo: “Daçiya”nı məğlub etmək üçün əlimizdən gələni edəcəyik”

“Kəpəz”in yeni transferi Serjio Manuel Kosta Karneyro “Bakı” ilə yoxlama oyunundan sonra jurnalistlərə müsahibə verib. Futbolxeber.az saytının əməkdaşının da suallarını cavablandıran braziliyalı yarımmüdafiəçinin müsahibəsini təqdim edirik:

- “Kəpəz” haqda ilkin təəssüratların necədir?

- Çox yaxşı komandaya gəlmişəm. “Kəpəz”in heyətində yaxşı oyunçular var. Məşqçimiz çox güclüdür. Ölkəni çox bəyəndim. İnsanlar çox mehribandırlar. Hər şey qaydasındadır.

- Komandada yenisən. Futbolçularla anlaşa bilirsən, yoxsa müəyyən qədər vaxta ehtiyac var?

- Futbol hər yanda eynidir. Düzdür, müəyyən qədər vaxta ehtiyacım var. 1-2 həftə ərzində uyğunlaşma prosesini başa vuracağam. Özümü rahat hiss etməyim üçün komanda yoldaşlarım da əllərindən gələni edirlər.

- Avroliqanın ilk təsnifat mərhələsində “Kəpəz” “Daçiya” ilə üz-üzə gələcək. İyunun 28-də qələbə qazanmaq mümkün olacaq?

- Çox çətin oyun olacaq. “Daçiya” yaxşı komandadır. Amma “Kəpəz” də zəif deyil. Qələbə qazanmaq üçün əlimizdən gələni edəcəyik. Çalışacağıq ki, azarkeşlərimizi sevindirək.

- Ümumiyyətlə, “Daçiya” haqda hansı məlumata sahibsən?

- Baş məşqçimiz bizə “Daçiya” haqda danışıb. Bilirik ki, Moldova təmsilçisi güclü rəqibdir. Heyətləri genişdir. Amma bütün bunlar bizim üçün problem deyil. Qələbə qazanmaq üçün əlimizdən gələni edəcəyik.