Şok açıqlama: “Onu elə bir adam xahiş edir ki, Prosineçki də keçə bilmir”

"Neftçi”nin sabiq baş məşqçisi Böyükağa Hacıyev yenə şok açıqlaması ilə diqqət mərkəzinə düşüb. Futbolxeber.az saytının məlumatına görə, AFFA-nın Məşqçilər Komitəsinin üzvü olan 58 yaşlı mütəxəssis "Xəzər TV”də yayımlanan "Futbol saatı” proqramının qonağı olub.

Verilişin əsas müzakirə mövzusu Azərbaycan milli komandasının ötən şənbə Qazaxıstan yığmasına Antalyada 0:1 hesabı ilə uduzduğu yoldaşlıq görüşü olub. Hacıyev qış fasiəsindən sonra "Qəbələ”yə keçsə də, hələ də debüt etməyən Pavel Paşayevi hədəfə alıb. O, millidə də turist rolunda olan müdafiəçini baş məşqçi Robert Prosineçkinin çağırmasına belə reaksiya göstərib: "Paşayevi yığmaya çağırıblarsa, görünür, hansısa səbəbi var. Bir az dərindən araşdırın. Ola bilər ki, səbəbini tapasınız. Bu gün Pavel klubunda oynamadığı halda, milliyə çağırılırsa, ola bilər ki, dayısı çox güclüdür. Bunun da üzü ətdəndir də, "podoş"dan deyil ki... Ola bilər, elə bir adam xahiş edir ki, keçə bilmir. Açıq söhbət! Daha nə eşitmək istəyirsiniz?”

Qeyd edək ki, Pavel Paşayev millidə debütünü ötən ilin noyabrında Azərbaycanın Bakıda Moldova yığmasına 2:1 hesabı ilə qalib gəldiyi yoldaşlıq görüşündə start heyətində meydana çıxmaqla edib. Ancaq Prosineçki Paşayevi Qazaxıstanla oyunda ehtiyatda saxlayıb (sportnet.az)