Səlahət Ağayev: “Maaş 30 gündən bir verilir, 50 gündən bir yox”

“İnter”in qapıçısı Səlahət Ağayevin Futbolxeber.az saytına müsahibəsi

- “Qəbələ” ilə səfər oyununda meydandan 1:1-lik heç-heçə ilə ayrıldınız. Qarşılaşma haqda nə deyə bilərsən?

- Bilirdik ki, bizi Qəbələdə asan oyun gözləmir. Çünki “Qəbələ” ilə oyunlarımız həmişə çətin alınır. Bu dəfə də elə oldu. Komanda sona qədər mübarizə apardı. Hesabda geri düşsək də, yenilgidən qaça bildik.

- “İnter” ardıcıl üçüncü oyunda meydandan heç-heçə ilə ayrıldı. Bunun səbəbi nədir?

- Komandamızın necə çətin durumda olduğunu hər kəs bilir. Belə vəziyyətdə heç-heçə etmək belə qəhrəmanlıqdır.

- Oyunun gedişində azarkeşlərlə problem yaşadın. Həmin anda nə baş vermişdi?

- Qapının arxasında dayanan azarkeşlər mənim təhqid edridilər. Mən də onlara bildirdim ki, nalayiq sözlərə ehtiyac yoxdur. Mən də azərbaycanlıyam. Qeyri-etik sözlərə nə gərək var ki? Sözlərim tək “Qəbələ” azarkeşlərinə aid deyil. Stadionlarda ümumiyyətlə bu cür hallara şahid olmaq istəməzdik.

- “İnter”in maliyyə durumunda irəliləyiş var?

- Elə də dəyişiklik yoxdu. Əvvəlki kimi yenə də çətin durumdayıq.

- Georgi Nikolov bildirdi ki, futbolçulara sentyabrın maaşları artıq verilib. Bu, düzdü?

- Düzdür, sentyabrın maaşını almışıq. Amma maaş 30 gündən bir verilir, 50 gündən bir yox.

- Nə vaxta qədər bu vəziyyətə dözmək fikriniz var?

-  Klubla müqaviləmiz var. Ona görə də dözməliyik.

- Komanda yoldaşların bildirmişdilər ki, vəziyyət düzəlməsə “Qəbələ” ilə oyuna çıxmayacaqlar...

- Bəli, belə söhbət olmuşdu. Amma sentyabrın maaşı ödənildiyi üçün meydana çıxdıq. Bayaq da dediyim kimi, maaşı 50 gündən bir vermək olmaz. Əvvəlki aylarda vaxtında alırdıq. Lakin bu dəfə gecikmə oldu.

- Avroliqaya görə də mükafatlarınızı almamısız?

- Ondan da heç bir xəbər yoxdu.

- Rəhbərlik bununla bağlı nə deyir?

- Bir söz deyən yoxdur. Klubun prezidenti Georgi Nikolovdur. Amma biz ondan rəhbər kimi heç bir qayğı görmürük. Komandada bir nəfər yoxdur ki, çıxıb nəsə desin.

- Vəziyyət düzəlməsə, qışda “İnter”dən getmək fikrin var?

- Mən hələ yayda da komandanı tərk edə bilərdim. Təkliflər almışdım. Amma “İnter”in yetirməsi olduğum üçün klubda qaldım. Bundan sonra nə olacağını demək çətindir. Amma kimsə qışda komandanı tərk etsə, buna görə həmin şəxsi qınamaq olmaz.

- Rəhbərliyə kollektiv şəkildə etiraz etmisiz?

- Öz aramızda söhbətlər çox olur. Lakin etiraz etməyə adam yoxdur. Bilirik ki, Beynəlxalq Bank komandanı maliyyələşdirir. Başqa heç nə.